កម្ពុជា-អាហ្សង់ទីន ត្រៀមខ្លួនក្នុងការធ្វើការយ៉ាងជិតស្និទ្ធដើម្បីពង្រឹងបន្ថែមនូវកិច្ចសហប្រតិបត្តិការដ៏ល្អរវាងប្រទេសទាំងពីរ

ភ្នំពេញ៖ កាលពីថ្ងៃទី២៧ ខែតុលា ឆ្នាំ២០២៣ ឯកឧត្តម ជុំ សុន្ទរី រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ បានទទួលការជួបសម្តែងការគួរសមរបស់ ឯកឧត្តម Gustavo Alberto Martino ក្នុងឱកាសដែល ឯកឧត្តម ត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋអាហ្សង់ទីន ប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងបាងកក។

ក្នុងជំនួបនោះ ឯកឧត្តមរដ្ឋលេខាធិការ និងឯកឧត្តមឯកអគ្គរដ្ឋទូត បានវាយតម្លៃខ្ពស់ចំពោះចំណងមិត្តភាព និងកិច្ចសហប្រតិបត្តិការជាប្រពៃណីរវាងកម្ពុជា និងសាធារណរដ្ឋអាហ្សង់ទីន និងបានគូសបញ្ជាក់ពីការប្តេជ្ញាចិត្តយ៉ាងមុតមាំសម្រាប់ការលើកកម្ពស់នៃទំនាក់ទំនងនេះ។

ឯកឧត្តមរដ្ឋលេខាធិការ និងឯកឧត្តមឯកអគ្គរដ្ឋទូត បានពិភាក្សាប្រកបដោយផលិតភាពលើការអនុវត្តផែនទីបង្ហាញផ្លូវសម្រាប់កិច្ចសហប្រតិបត្តិការទ្វេភាគីដែលបានព្រមព្រៀងគ្នាក្នុងអំឡុងការពិគ្រោះយោបល់ទ្វេភាគីលើកទីមួយ ហើយបានចែករំលែកការប្តេជ្ញាចិត្តដូចគ្នាក្នុងការពង្រឹងបន្ថែមទៀតនូវកិច្ចសហប្រតិបត្តិការរវាងប្រទេសទាំងពីរ។ ភាគីទាំងពីរ បានពិភាក្សាអំពីវិធី និងមធ្យោបាយដើម្បីឆ្ពោះទៅមុខនូវកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគ ទេសចរណ៍ និងកសិកម្ម។

ភាគីទាំងពីរ ក៏បានបញ្ជាក់ពីការត្រៀមខ្លួនក្នុងការធ្វើការយ៉ាងជិតស្និទ្ធដើម្បីពង្រឹងបន្ថែមទៀតនូវកិច្ចសហប្រតិបត្តិការដ៏ល្អរវាងប្រទេសទាំងពីរ តាមរយៈការជួយគ្នាទៅវិញទៅមកនៅក្នុងអង្គការសហប្រជាជាតិ និងអង្គការអន្តរជាតិ និងក្របខ័ណ្ឌកិច្ចសហប្រតិបត្តិការ ASEAN-MERCOSUR ៕