គោលដៅទេសចរណ៍សំខាន់ៗក្នុងខេត្តសៀមរាប បានតៀមរួចរាល់ហើយ សម្រាប់ស្វាគមន៍ភ្ញៀវទេសចរក្នុងឱកាសបុណ្យអុំទូក

ភ្នំពេញ៖ លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានថ្លែងឱ្យថឹងនៅថ្ងៃទី០១ ខែវិច្ឆិកា ឆ្នាំ២០២៣នេះថា ដើម្បីរួមចំណែកក្នុងការថែរក្សា និង លើកកម្ពស់វប្បធម៌ អរិយធម៌ ទំនៀមទម្លាប់ និងប្រពៃណីជាតិ ក៏ដូចជាការផ្ដល់ឱកាសជូន ប្រជាជនភ្ញៀវទេសចរជាតិ និងអន្តរជាតិ បានចូលរួមកម្សាន្តសប្បាយ រដ្ឋបាលខេត្តសៀមរាប នឹងរៀបចំប្រារព្ធ ពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល២ថ្ងៃ ចាប់ពីថ្ងៃទី២៦ ដល់ថ្ងៃទី២៧ ខែវិច្ឆិកា ឆ្នាំ២០២៣ នៅតាមបណ្ដោយដងស្ទឹងសៀមរាប ចាប់ពីស្ពានអតីតមន្ទីរ ទេសចរណ៍ចាស់ រហូតដល់ស្ពានវត្តដំណាក់ ដែលមានកម្មវិធីដូចជា ការប្រណាំងទូកពាក់ កណ្តាលផ្តាច់ព្រ័ត្រ ពិធីដង្ហែ និងបណ្តែតប្រទីប ពិធីសំពះព្រះខែ អកអំបុក។

លោកបន្តថា ក្រៅពីនេះ រដ្ឋបាលខេត្តសៀមរាប សហការជាមួយសហភាពសហព័ន្ធ យុវជនកម្ពុជា ខេត្តសៀមរាប ព្រមទាំងវិស័យឯកជននានា រៀបចំកម្មវិធីមួយចំនួនទៀតរួមមាន៖ ការជិះទូក កម្សាន្ត ផ្សារទឹក ការតាំងពិព័រណ៍ផលិតផលផ្សេងៗ ព្រមទាំង មានការប្រគំតន្ត្រី សិល្បៈ បុរាណសម័យ និងការប្រកួតប្រដាល់គុនខ្មែរ ដែលនឹងប្រព្រឹត្តិទៅចាប់ពីថ្ងៃទី២៥ ដល់ថ្ងៃទី២៨ ខែវិច្ឆិកា ឆ្នាំ២០២៣ ដើម្បីញ៉ាំងឱ្យព្រះរាជពិធីបុណ្យនេះ កាន់តែមានភាព អធិកអធម ថែមទៀត។

លោកប្រធានមន្ទីរបន្ថែមថា ក្រៅពីកម្មវិធីដែលបានរៀបចំ នៅឯតាមគោលដៅទេសចរណ៍ សំខាន់ៗក្នុងខេត្តសៀមរាប ក៏បានតៀមរួចរាល់ហើយ សម្រាប់ស្វាគមន៍ភ្ញៀវទេសចរក្នុង ឱកាសបុណ្យអុំទូក ដូចជា នៅតំបន់រមណីយដ្ឋានអង្គរ តំបន់ភ្នំគូលែន តំបន់ក្នុងក្រុង សៀមរាប និងតំបន់បឹងទន្លេសាបជាដើម។ ជាមួយគ្នានេះ អាជ្ញាធរក៏បានធ្វើការណែនាំឱ្យ ម្ចាស់កន្លែងផ្តល់សេវាកម្មទេសចរណ៍ទាំងអស់ដូចជា សេវាកម្មស្នាក់នៅ សេវាកម្មម្ហូបអាហារ និងសេវាកម្មដឹកជញ្ជូន មិនឱ្យធ្វើការដំឡើងថ្លៃនោះទេ ដើម្បីធ្វើយ៉ាងណាឱ្យភ្ញៀវទេសចរ ដែលមកកម្សាន្តនៅខេត្តសៀមរាបបានសប្បាយ និងពេញចិត្តចំពោះការផ្តល់សេវា ទេសចរណ៍។

យោងតាមរបាយការណ៍របស់មន្ទីរទេសចរណ៍ខេត្តសៀមរាប ត្រឹម៩ខែ ឆ្នាំ២០២៣នេះ មូលដ្ឋានអាជីវកម្មទេសចរណ៍ក្នុងខេត្តសៀមរាប ទើបតែបើកដំណើរការឡើងវិញ បាន ចំនួន៧១ភាគរយ នៃចំនួនអាជីវកម្មសរុប ១,១៦៥ទីតាំង ក្នុងនោះសណ្ឋាគារបានបើក ឡើងវិញប្រមាណ១៤៨ទីតាំង ស្មើនឹង៧៩២៦បន្ទប់ ស្មើនឹង ៦៥ភាគរយ ផ្ទះសំណាក់ ២១៣ទីតាំងស្មើនឹង៣,៧៣៥បន្ទប់ និងភោជនីយដ្ឋាន ១២០ទីតាំង ស្មើនឹង ៦១ភាគរយ ខណៈ ដែលចំនួនទេសចរដែលមកដល់ខេត្តសៀមរាបវិញ មានជើងហោះហើរចូល ចំនួនជាង ២០ជើងក្នុងមួយថ្ងៃ ហើយមានអ្នកដំណើរចំនួនចន្លោះពី ២,០០០ ទៅ ២,៦០០នាក់។ ភ្ញៀវទេសចរអន្តរជាតិដែលទិញបណ្ណចូលទស្សនា រមណីយដ្ឋាន អង្គរមានចំនួនសរុប ប្រមាណ ៥៤ម៉ឺននាក់ ក្នុងរយៈពេល៩ខែឆ្នាំ២០២៣៕