រដ្ឋបាលខេត្តស្ទឹងត្រែង ណែនាំស្តីពីការជំរុញការប្រើប្រាស់ប័ណ្ណព្រំដែនកម្ពុជា-ឡាវ និងការបញ្ឈប់ការប្រើប្រាស់ប័ណ្ណឆ្លងដែន

ភ្នំពេញ៖ រដ្ឋបាលខេត្តស្ទឹងត្រែង បានចេញសេចក្ដីណែនាំស្តីពីការជំរុញការប្រើប្រាស់ប័ណ្ណព្រំដែនកម្ពុជា-ឡាវ និងការបញ្ឈប់ការប្រើប្រាស់ប័ណ្ណឆ្លងដែន។

នៅក្នុងសេក្ដីណែនាំរបស់រដ្ឋបាលខេត្តស្ទឹងត្រែងបានឱ្យដឹងថា យោងប្រកាស លេខ១៤៦៩ ប្រក ស្ដីពីបែបបទ និងនីតិវិធីនៃការផ្តល់ប័ណ្ណព្រំដែនកម្ពុជា ឡាវ (Border Pass) របស់ ក្រសួងមហាផ្ទៃ ចុះថ្ងៃទី១៦ ខែមិថុនា ឆ្នាំ២០១៧ និងយោងអនុសាសន៍ណែនាំរបស់ឯកឧត្ដមអភិបាលនៃគណៈអភិបាលខេត្ត រដ្ឋបាលខេត្ត សូមជម្រាបជូនមន្ត្រី និងសមត្ថកិច្ចពាក់ព័ន្ធនៅច្រកទ្វារព្រំដែនអន្តរជាតិត្រពាំងក្រៀល និងសមត្ថកិច្ចកងកម្លាំងដែលឈរ ជើងនៅតាមខ្សែរបន្ទាត់ព្រំដែនកម្ពុជា-ឡាវ រដ្ឋបាលក្រុង ស្រុក មេត្តាជ្រាបថា ដើម្បីពង្រឹងប្រសិទ្ធភាពនៃការផ្តល់ និងការប្រើប្រាស់ ប័ណ្ណព្រំដែនឱ្យបានទូលំទូលាយស្របតាមគោលការណ៍របស់រាជរដ្ឋាភិបាល និងលិខិតបទដ្ឋានគតិយុត្តជាធរមាន រដ្ឋបាលខេត្ត សូមណែនាំដូចខាងក្រោម៖

១-ផ្សព្វផ្សាយឱ្យបានទូលំទូលាយជូនប្រជាពលរដ្ឋដែលមានលំនៅដ្ឋានអចិន្ត្រៃយ៍នៅក្នុងខេត្តស្ទឹងត្រែង ដែលមិនមាន លិខិតឆ្លងដែន ហើយមានបំណងធ្វើដំណើរឆ្លងដែនទៅកាន់ខេត្តចំប៉ាសាក់ និងខេត្តអត្តពឺ នៃសាធារណរដ្ឋប្រជាធិបតេយ្យប្រជា មានិតឡាវ ឱ្យដាក់ពាក្យស្នើសុំប័ណ្ណព្រំដែននៅអង្គភាពច្រកចេញចូលតែមួយខេត្ត ដោយភ្ជាប់មកជាមួយនូវអត្តសញ្ញាណប័ណ្ណ សញ្ញាតិខ្មែរ ឬសំបុត្រកំណើត ឬសំបុត្របញ្ជាក់កំណើតដែលជាច្បាប់ដើម ឬចម្លងត្រឹមត្រូវតាមច្បាប់ដើម, សៀវភៅគ្រួសារ ឬ សៀវភៅស្នាក់នៅ និងរូបថតសាមីខ្លួន ទំហំ៤x៦ ចំនួន ០២សន្លឹក។ សម្រាប់ប្រជាពលរដ្ឋដែលមានលំនៅដ្ឋាននៅជាប់ព្រំដែន កម្ពុជា-ឡាវ អាចដាក់ពាក្យស្នើសុំប័ណ្ណព្រំដែននៅច្រកទ្វារព្រំដែនអន្តរជាតិត្រពាំងក្រៀល ដោយផ្ទាល់បាន។ ចំពោះកុមារដែលមាន អាយុក្រោម ១៥ឆ្នាំ ត្រូវមានសំណើសុំ ឬការអនុញ្ញាតជាលាយលក្ខណ៍អក្សរពីឳពុក ឬម្តាយ ឬអាណាព្យាបាល។ កុមារអាយុក្រោម ១២ឆ្នាំ អាចដាក់បញ្ចូលជាមួយប័ណ្ណព្រំដែនរបស់ឳពុក ឬម្តាយ ឬអាណាព្យាបាលបាន ដោយភ្ជាប់មកនូវឯកសារពាក់ព័ន្ធ។ សេវា សម្រាប់ការស្នើសុំប័ណ្ណព្រំដែនកម្ពុជា-ឡាវ មានតម្លៃ២០.០០០រៀល (ពីរម៉ឺនរៀល) មានសុពលភាពរយៈពេល ០១ឆ្នាំ និងអាច បន្តសុពលភាពបានយ៉ាងយូរ០១ឆ្នាំ ដោយតម្លៃសេវា ១០.០០០រៀល (មួយម៉ឺនរៀល)។

២-ការិយាល័យច្រកចេញចូលតែមួយក្រុង ស្រុក ពន្លឿនការបញ្ជាក់លើឯកសារពាក់ព័ន្ធជូនប្រជាពលរដ្ឋដែលត្រូវប្រើ ប្រាស់សម្រាប់ដាក់ពាក្យស្នើសុំប័ណ្ណព្រំដែន នៅអង្គភាពច្រកចេញចូលតែមួយខេត្តឱ្យបានទាន់ពេលវេលា។

៣-ត្រូវបញ្ឈប់ការផ្តល់ប័ណ្ណឆ្លងដែន (LP) ជូនប្រជាពលរដ្ឋ និងលិខិតសម្រាប់ឆ្លងដែនជាក្រុមរយៈពេលខ្លី (វិលវិញ ក្នុងថ្ងៃតែមួយ) ដើម្បីទស្សនាទឹកធ្លាក់ក្នុងទឹកដីឡាវដែលមានភូមិសាស្ត្រជាប់ព្រំដែនដែលធ្លាប់ប្រើប្រាស់កន្លងមក ដោយត្រូវចាប់ ផ្ដើមអនុវត្តក្នុងរយៈពេលមួយសប្ដាហ៍បន្ទាប់ពីសេចក្ដីណែនាំនេះ។

រដ្ឋបាលខេត្តបានបញ្ជាក់ថា ទទួលបានសេចក្ដីណែនាំនេះ សូមមន្ត្រីមានសមត្ថកិច្ច និងអង្គភាពពាក់ព័ន្ធ និងរដ្ឋបាលក្រុង ស្រុក អនុវត្តឲ្យបានម៉ឺង ម៉ាត់ និងមានប្រសិទ្ធភាព ប្រកបដោយស្មារតីទទួលខុសត្រូវខ្ពស់ចាប់ពីថ្ងៃចុះហត្ថលេខានេះតទៅ៕