នាយករដ្ឋមន្ត្រី ហ៊ុន ម៉ាណែត៖ ការរៀបចំមហាសន្និបាតលើកទី៧ មិត្តនារីកាយឫទ្ធិតំបន់អាសុីប៉ាស៊ីហ្វិកនេះ ជាព្រឹត្តិការណ៍ប្រវត្តិសាស្ត្រ និងមានអត្ថន័យសម្រាប់សមាគមន៍កាយឫទ្ធិនារីកម្ពុជា
ភ្នំពេញ៖ សម្ដេចមហាធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ការរៀបចំមហាសន្និបាតលើកទី៧ មិត្តនារីកាយឫទ្ធិតំបន់អាសុីប៉ាស៊ីហ្វិកនេះ មិនតែជាព្រឹត្តិការណ៍ប្រចាំតំបន់អាសុីប៉ាសុីហ្វិកប៉ុណ្ណោះទេ តែក៏ជាព្រឹត្តិការណ៍ប្រវត្តិសាស្ត្រ និងមានអត្ថន័យសម្រាប់សមាគមន៍កាយឫទ្ធិនារីកម្ពុជា ដែលត្រូវបានផ្ដល់ទំនុកចិត្តឲ្យធ្វើជាម្ចាស់ផ្ទះរៀបចំមហាសន្និបាតនេះ និងបង្ហាញជូនសមាជិកទាំងអស់នូវការរីកចម្រើនរបស់សមាគមន៍ ដែលក្រោមម្លប់នៃសុខសន្តិភាព ស្ថេរភាព និងឯកភាពជាតិនៅកម្ពុជា។
ក្នុងឱកាសអញ្ជើញបើកមហាសន្និបាតមិត្តកាយឫទ្ធិនារីតំបន់អាស៊ីប៉ាស៊ីហ្វិក នាព្រឹកថ្ងៃទី០៥ ខែវិច្ឆិកា ឆ្នាំ២០២៣សម្តេចធិបតី ហ៊ុន ម៉ាណែត មានប្រសាសន៍ថា ការធ្វើម្ចាស់ផ្ទះនេះក៏ជាបទពិសោធន៍ដ៏សំខាន់សម្រាប់កម្ពុជាក្នុងការត្រៀមធ្វើជាម្ចាស់ផ្ទះមហាសន្និបាតពិភពលោកលើកទី៣៩ នៅឆ្នាំ២០២៦ របស់សមាគមន៍កាយឫទ្ធិនារីពិភពលោកផងដែរ។
សម្តេចធិបតី ក៏បានថ្លែងអំណរគុណដ៏ជ្រាលជ្រៅចំពោះសមាគមន៍កាយឫទ្ធិនារីកម្ពុជា ដែលបានចំណាយទាំងកម្លាំងកាយចិត្តរៀបចំមហាសន្និបាតនេះឡើងយ៉ាងអធិកអធម។ ហើយសូមអរគុណដល់រដ្ឋបាលខេត្តសៀមរាប កងកម្លាំងប្រដាប់អាវុធ និងអាជ្ញាធរពាក់ព័ន្ធគ្រប់លំដាប់ថ្នាក់ដែលចូលរួមសហការគ្នាយ៉ាងល្អក្នុងការរៀបចំសណ្ដាប់ធ្នាប់ ការពារសន្តិសុខសុវត្ថិភាព ធ្វើឲ្យមហាសន្និបាតលើក៧នេះប្រព្រឹត្តទៅដោយរលូន។
បានបន្ទាប់ពីបានស្តាប់នូវមតិស្វាគមន៍ និងរបាយការណ៍របស់ លោកជំទាវបណ្ឌិត ពេជ ចន្ទមុន្នី អគ្គស្នងការសមាគមន៍កាយឫទ្ធិនារីកម្ពុជា សម្តេចធិបតី ហ៊ុន ម៉ាណែត ក៏សូមកោតសរសើរ និងវាយតម្លៃខ្ពស់ចំពោះបេសកកម្មដ៏ថ្លៃថ្លារបស់មិត្តកាយឫទ្ធិនារីតំបន់អាសុីប៉ាសុីហ្វិក ក្នុងការលើកកម្ពស់ចលនាកាយឫទ្ធិនារីនៅក្នុងតំបន់ ក៏ដូចជាការចូលរួមជាមួយសមាគមន៍កាយឫទ្ធិនារីពិភពលោក ក្នុងការអប់រំបណ្តុះបណ្តាលដល់នារី ដល់យុវតី កុមារី និងស្រ្តីវ័យក្មេង ឲ្យក្លាយជាអ្នកដឹកនាំប្រកបដោយសមត្ថភាព និងទំនុកចិត្ត ៕
