ឧត្តមសេនីយ៍ឯក សុខ វាសនា ទទួលស្វាគមន៍ កុងស៊ុល នៃស្ថានទូតបារាំង ប្រចាំកម្ពុជា ចូលជួបសម្ដែងការគួរសម និងពិភាក្សាការងារ

ភ្នំពេញ៖ ឯកឧត្ដម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ នារសៀលថ្ងៃអង្គារ ៩រោច ខែអស្សុជ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៧ ខែវិច្ឆិកា ឆ្នាំ២០២៣ បានទទួលស្វាគមន៍លោកស្រី Sophie Guegan កុងស៊ុល នៃស្ថានទូតសាធារណរដ្ឋបារាំង ប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ នៅអគ្គនាយកដ្ឋានអន្តោប្រវេសន៍។

ជាកិច្ចចាប់ផ្តើម ឯកឧត្ដម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានសម្តែងការស្វាគមន៍ចំពោះ លោកស្រី Sophie Guegan កុងស៊ុល នៃស្ថានទូតសាធារណរដ្ឋបារាំង ប្រចាំព្រះរាជាណាចក្រកម្ពុជា និងបានវាយតម្លៃខ្ពស់ចំពោះកិច្ចសហប្រតិបត្តិការនាពេលកន្លងមក រវាងភាគីបារាំង និងភាគីកម្ពុជា។

នាឱកាសនេះផងដែរ លោកស្រី Sophie Guegan ក៏បានធ្វើការជូនព័ត៌មានពាក់ព័ន្ធ ក៏ដូចជាការផ្លាស់ប្ដូរកន្លែងថ្មីកុងស៊ុលបារាំងប្រចាំនៅកម្ពុជា ចំពោះសេវាកម្មផ្ដល់ទិដ្ឋាការសម្រាប់សហគមន៍អ៉ឺបរ៉ុបដែលមានទីតាំងថ្មីអាគារវឌ្ឍន:ដែលគម្រោងនឹងបេីកដំណេីរការនៅថ្ងៃទី១៣ ខែធ្នូ ឆ្នាំ២០២៣ ខាងមុខនេះ។

ឯកឧត្ដម ឧត្តមសេនីយ៍ឯក អគ្គនាយក បានថ្លែងអំណរគុណចំពោះការអញ្ជេីញមករបស់លោកស្រី Sophie Guegan កុងស៊ុល នៃស្ថានទូតសាធារណរដ្ឋបារាំង ប្រចាំព្រះរាជាណាចក្រកម្ពុជា ដែលតាំងតែជួយក្នុងការរកដោះស្រាយនូវបញ្ហាប្រឈមរបស់ជនបរទេសជនជាតិបារាំង ដ៏ដូចជាជនជាតិសញ្ជាតិអ៉ឺបរ៉ុបដែលមានបញ្ហាក្នុងព្រះរាជាណាចក្រកម្ពុជានាពេលកន្លងមក។

ជាចុងបញ្ចប់ ឯកឧត្តម ឧត្តមសេនីយ៍ឯក អគ្គនាយក បានធ្វើការថ្លែងអំណរគុណចំពោះកិច្ចសហប្រតិបត្តិការកន្លងមក និងសង្ឃឹមថាអង្គភាពទាំងពីរបន្តកិច្ចសហប្រតិបត្តិការព្រះរាជាណាចក្រកម្ពុជា និងស្ថានទូតបារាំងឱ្យកាន់តែប្រសើរឡើង ៕