ជើងហោះហើរពីទីក្រុងដាណាង ទៅទីក្រុងហាណូយ ត្រូវពន្យារពេលជាងពីរម៉ោង បន្ទាប់ពីប្រុសពីរនាក់បានអះអាងថា ពួកគេកាន់កាំភ្លើងនៅលើយន្តហោះ
បរទេស៖ ជើងហោះហើរពីទីក្រុងដាណាង ទៅទីក្រុងហាណូយ ត្រូវបានពន្យារពេលជាងពីរម៉ោងកាលពីយប់ថ្ងៃអង្គារ បន្ទាប់ពីអ្នកដំណើរប្រុសពីរនាក់បានអះអាងថា ពួកគេកាន់កាំភ្លើងនៅលើយន្តហោះ។
ជើងហោះហើរនេះត្រូវបានកំណត់ពេលចេញដំណើរនៅម៉ោង ៧:២៥យប់ នេះបើតាមអាជ្ញាធរអាកាសយានដ្ឋានកណ្តាល។
ទោះជាយ៉ាងណា ពេលយន្តហោះហៀបនឹងហោះឡើង អ្នកដំណើរម្នាក់បានសួរដៃគូគាត់ថា “កាំភ្លើងនៅឯណា?” គាត់បានឆ្លើយថា គាត់ទុកវានៅក្នុងអីវ៉ាន់របស់គាត់។
ភ្លាមៗនោះ ប្រធានក្រុមបានសម្រេចចិត្តពន្យារពេលជើងហោះហើរ ដើម្បីផ្ទៀងផ្ទាត់សេចក្តីថ្លែងការណ៍របស់ពួកគេ និងពិនិត្យមើលបញ្ហាសុវត្ថិភាព។
អ្នកដំណើរទាំងពីរនាក់ត្រូវបានមន្ត្រីសន្តិសុខព្រលានយន្តហោះ Da Nang យកចុះពីលើយន្តហោះ ហើយអ្នកដំណើរទាំងអស់ និងអីវ៉ាន់ត្រូវបានពិនិត្យសុវត្ថិភាពឡើងវិញ។
នៅម៉ោង ៩ យប់ នៅថ្ងៃដដែលនោះ ដំណើរការស្វែងរកយន្តហោះ អ្នកដំណើរ និងអីវ៉ាន់ត្រូវបានបញ្ចប់ ប៉ុន្តែភ្នាក់ងារសន្តិសុខមិនបានរកឃើញវត្ថុគ្រោះថ្នាក់ ឬគ្រឿងផ្ទុះដែលហាមឃាត់នោះទេ។
បន្ទាប់ពីការពន្យាពេល ២.៥ ម៉ោង ជើងហោះហើរបានបន្តធ្វើដំណើរពីទីក្រុង Da Nang ទៅកាន់ទីក្រុងហាណូយ។
អាជ្ញាធរអាកាសចរណ៍បានឲ្យដឹងថា អ្នកដំណើរមកពីខេត្ត Thai Binh ភាគខាងជើង។ ពួកគេមិនត្រូវបានអនុញ្ញាតឱ្យឡើងយន្តហោះទៅហាណូយទេ។ អាជ្ញាធរអាកាសចរណ៍កំពុងពិចារណាដាក់ទណ្ឌកម្មពួកគេ។
អ្នកដែលផ្សព្វផ្សាយពាក្យចចាមអារ៉ាម ឬផ្តល់ព័ត៌មានមិនពិតអំពីវត្តមានរបស់កាំភ្លើង គ្រាប់កាំភ្លើង គ្រាប់បែក មីន សារធាតុផ្ទុះ សារធាតុវិទ្យុសកម្ម អាវុធជីវសាស្រ្ត ឬគីមីនៅលើជើងហោះហើរ អាចនឹងត្រូវពិន័យជាប្រាក់ពី ២០លានដុង ទៅ ៤០លានដុងក្នុងមនុស្សម្នាក់។
អាស្រ័យលើកម្រិតនៃគ្រោះថ្នាក់ និងការខូចខាតដែលបង្កឡើង ពួកគេក៏អាចត្រូវបានកាត់ទោសពីបទរារាំងចរាចរណ៍ផ្លូវអាកាសផងដែរ។
ប្រភព៖ vnexpress
ប្រែសម្រួលដោយ៖ ឡាយ លីហួ
