សម្ដេចធិបតី ណែនាំឱ្យកងទ័ពត្រៀមលក្ខណៈជានិច្ចដើម្បីទប់ស្កាត់ករណីភេរវកម្ម ដែលអាចកើតមានលើទឹកដីកម្ពុជា
ភ្នំពេញ៖ នាយករដ្ឋមន្ដ្រីកម្ពុជាសម្ដេចមហាបវរធិបតី ហ៊ុន ម៉ាណែត បានណែនាំឱ្យកងទ័ពទាំងអស់ ត្រូវត្រៀមលក្ខណៈឱ្យបានរួចរាល់ដើម្បីទប់ស្កាត់ករណីភេរវកម្ម ព្រោះអត់មានអ្នកណាទាយដឹងថា «ភេរវកម្ម មិនអាចកើតមានលើទឹកដីកម្ពុជានោះទេ»។
ក្នុងឱកាសអញ្ជើញជាអធិបតី ពិធីអបអរសាទរខួបអនុស្សាវរីយ៍លើកទី ២៨ ថ្ងៃបង្កើតបញ្ជាការដ្ឋានទ័ពពិសេស (៩ វិច្ឆិកា ១៩៩៥-៩ វិច្ឆិកា ២០២៣) នាព្រឹកថ្ងៃទី ១០ ខែវិច្ឆិកា ឆ្នាំ ២០២៣ នៅបញ្ជាការដ្ឋានទ័ពពិសេស ក្នុងរាជធានីភ្នំពេញសម្ដេចធិបតី ហ៊ុន ម៉ាណែត បានបញ្ជាក់ថា នាពេលកន្លងទៅ កងទ័ពបានទប់ស្កាត់ករណីភេរវកម្ម ជាច្រើនករណី ដូច្នេះ កងទ័ពទាំងអស់ ត្រូវត្រៀមលក្ខណៈផងដែរ។
សម្ដេចធិបតីបានគូសបញ្ជាក់ទៀតថា “ប្រយុទ្ធប្រឆាំងអំពើភេរវកម្មដែលអាចកើតមានឡើង ហើយកិច្ចការងារនេះ ជាការងារសំខាន់ យើងសង្ឃឹមថា វាមិនកើត តែយើងត្រៀមលក្ខណៈប្រសិនវាកើត អត់មានពីណាទាយបានថា ភេរវកម្ម មិនអាចកើតមានលើទឹកដីកម្ពុជានោះទេ ហើយយើងក៏ធ្លាប់មានករណីជាច្រើន ដែលយើងអាចទប់ស្កាត់ និងអាចបង្ការបាននៅពេលភេរវករ ក្នុងការវាយប្រហារនៅលើទឹកដីរបស់យើង”។
សម្ដេចធិបតីក៏បានណែនាំកងទ័ពត្រូវត្រៀមលក្ខណៈ ការពារនៅតំបន់មួយចំនួន ដូចជា នៅខេត្តព្រះសីហនុ ខេត្តសៀមរាប និងរាជធានីភ្នំពេញ ដែលមានវត្តមាននូវភ្ញៀវទេចជាច្រើន ព្រោះថា ការគំរាមកំហែង បែបមិនប្រព្រៃណីនេះ គឺជាការឆ្លងព្រំដែន៕
