ប្រធានាធិបតីចិន អញ្ជើញពិនិត្យមើលការកសាងឡើងវិញក្រោយទឹកជំនន់នៅទីក្រុងប៉េកាំង និងខេត្ត Hebei

ប៉េកាំង៖ លោក Xi Jinping ប្រធានាធិបតីចិនកាលពីថ្ងៃសុក្របានទៅទស្សនាតំបន់ដែលរងគ្រោះដោយទឹកជំនន់ក្នុងរដូវក្តៅនេះក្នុងទីក្រុងប៉េកាំង និងខេត្ត Hebei។

លោក Xi Jinping ក៏ជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន (CPC) និងជាប្រធានគណៈកម្មាធិការយោធាមជ្ឈិមបានអំពាវនាវឱ្យមានការខិតខំប្រឹងប្រែងជាបន្តបន្ទាប់ក្នុងការកសាងឡើងវិញក្រោយទឹកជំនន់ ដើម្បីធានាថាប្រជាជនក្នុងតំបន់អាចរស់នៅប្រកបដោយផាសុកភាព និងចំណាយពេលរដូវរងាដ៏កក់ក្តៅ។

លោក Xi Jinping បានសង្កត់ធ្ងន់លើការប្រកាន់ខ្ជាប់នូវវិធីសាស្រ្តដែលផ្តោតលើប្រជាជន និងបានអំពាវនាវឱ្យមានការខិតខំប្រឹងប្រែងឡើងវិញដើម្បីដោះស្រាយចន្លោះប្រហោងសុវត្ថិភាព និងពង្រឹងទំនាក់ទំនងខ្សោយ។

លោកបានជំរុញឲ្យមានការពន្លឿនវឌ្ឍនភាពក្នុងការកែលម្អប្រព័ន្ធនៃគម្រោងការពារទឹកជំនន់ និងការគ្រប់គ្រងគ្រាអាសន្ន និងការពង្រឹងសមត្ថភាពទប់ស្កាត់គ្រោះមហន្តរាយ កាត់បន្ថយ និងសង្គ្រោះជាបន្តបន្ទាប់។

នៅចុងខែកក្កដា និងដើមខែសីហា ទីក្រុងប៉េកាំង ហឺប៉ី និងតំបន់មួយចំនួនផ្សេងទៀតនៃប្រទេសចិនបានរងគ្រោះដោយទឹកជំនន់ និងគ្រោះមហន្តរាយភូមិសាស្ត្រដែលបណ្តាលមកពីភ្លៀងធ្លាក់ខ្លាំង ដែលបណ្តាលឱ្យមានអ្នកស្លាប់ និងរបួសយ៉ាងធ្ងន់ធ្ងរ។

លោក Xi Jinping តែងតែយកចិត្តទុកដាក់ចំពោះប្រជាពលរដ្ឋដែលរងគ្រោះដោយទឹកជំនន់ ហើយបានណែនាំអាជ្ញាធរពាក់ព័ន្ធជាច្រើនដង ដើម្បីធានាសុវត្ថិភាពអាយុជីវិត និងទ្រព្យសម្បត្តិរបស់ប្រជាជន ក៏ដូចជាការស្តារឡើងវិញនូវភាពប្រក្រតីនៃការងារ និងជីវិតនៅក្នុងតំបន់ដែលរងគ្រោះដោយគ្រោះមហន្តរាយ។

នៅដើមខែកញ្ញា លោក Xi Jinping បានទៅសួរសុខទុក្ខអ្នកភូមិដែលរងផលប៉ះពាល់ដោយទឹកជំនន់នៅទីក្រុង Shangzhi ខេត្ត Heilongjiang ភាគឦសានប្រទេសចិន។ នៅពេលដែលរដូវរងាខិតជិតមកដល់ភាគខាងជើងប្រទេសចិន លោក Xi Jinping បានទៅសួរសុខទុក្ខអ្នកស្រុកដែលរងគ្រោះដោយទឹកជំនន់នៅទីក្រុងប៉េកាំង និងហឺប៉ី ហើយបានពិនិត្យការងារសាងសង់ឡើងវិញក្រោយគ្រោះមហន្តរាយ។

ប្រភព៖ Hinhua Net

ប្រែសម្រួលដោយ៖ ឡាយ លីហួ