សម្តេចធិបតី៖ ៣ខែមកនេះ រាជរដ្ឋាភិបាលមិនបានដេកអេះពោះទេ គឺបានដាក់ចេញគោលនយោបាយជាច្រើន

ភ្នំពេញ៖ សម្តេចមហាបធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា រយៈពេល៣ខែនេះ រាជរដ្ឋាភិបាលមិនបានដេកអេះពោះ ហើយដើរខ្ចីតែលុយគេនោះទេ គឺរាជរដ្ឋាភិបាលបានដាក់ចេញ នូវគោលនយោបាយអភិវឌ្ឍន៍ និងសម្ពោធសមិទ្ធផលជាច្រើន ដើម្បីផ្តល់ផលប្រយោជន៍ដល់ប្រជាពលរដ្ឋ។

ក្នុងឱកាសអញ្ជើញសម្ពោធដាក់ឱ្យប្រើប្រាស់​កំណាត់​ផ្លូវ​ជាតិ​លេខ៥ ពីព្រែកក្តាម ដល់បាត់ដំបង និងបើកការដ្ឋានសង់ពីសិរីសោភ័ណ ទៅប៉ោយប៉ែត នាថ្ងៃទី២២ ខែវិច្ឆិកា ឆ្នាំ២០២៣ សម្តេចធិបតីមានប្រសាសន៍ថា តម្រូវការថវិកាជាតិមានច្រើន ដើម្បីយកទៅវិនិយោគលើវិស័យផ្សេងៗ ក្នុងនោះរួមទាំងវិស័យហេដ្ឋាសម្ព័ន្ធដែលជាសរសៃឈាមដ៏សំខាន់ ដូច្នេះហើយតម្រូវឱ្យមានកម្ចីពីបរទេស ដើម្បីកសាងហេដ្ឋារចនាសម្ព័ន្ធចាំបាច់ផ្សេង។

សម្តេចបញ្ជាក់ថា «មានការចោទសួរច្រើនណាស់ ហើយខ្ញុំឃើញលើកវាយប្រហាររដ្ឋាភិបាល មានមួយនោះគេថា រដ្ឋាភិបាលខ្មែរ៩០ថ្ងៃមកនេះ ដេករហូតហើយដើរតែខ្ចីលុយគេ។ ការទាញយកឥណទាន នៅក្នុងការអភិវឌ្ឍផ្លូវ ជាជម្រើសសម្រាប់គ្រប់ប្រទេសទាំងអស់ ទី១-រដ្ឋាភិបាលប្រើប្រាស់ប្រាក់កម្ចី ពីបណ្តាប្រទេសផ្សេងៗ, ទី២-រដ្ឋាភិបាលខ្ចីពីប្រជាពលរដ្ឋ ដែលនៅប្រទេសជាច្រើនបានធ្វើតាមរយៈការចេញ Bond ឬផ្តល់កម្ចីតាមរូបភាពផ្សេងៗ ប៉ុន្តែអ្វីដែលសំខាន់ការវិនិយោគនោះ ត្រូវមានការទទួលខុសត្រូវខ្ពស់ ដែលមានលទ្ធភាពសងត្រឡប់ទៅវិញបាន។ កម្ចីមិនថាពីជប៉ុន ពីចិន ពីធនាគារពិភពលោក ឬពីបណ្តាប្រទេសផ្សេងៗ ដើម្បីធ្វើការវិនិយោគ បង្កើនលទ្ធភាពយើងដោះស្រាយបញ្ហាឱ្យបានលឿន ។ អ្វីដែលសំខាន់ គឺការគ្រប់គ្រងបំណុលសាធារណៈនេះ គឺយើងមានកំណត់ ច្បាប់របស់យើងមិនឱ្យធ្ងន់ពេក ដែលនាំឱ្យបាត់ម្ចាស់ការនោះទេ ហើយការខ្ចីបំណុល យកមកវិនិយោគដោយត្រឹមត្រូវ ដើម្បីបង្កើតចរន្តសេដ្ឋកិច្ច ដែលចែកផលដល់ប្រជាពលរដ្ឋ»។

សម្តេចបញ្ជាក់ទៀតថា «រដ្ឋាភិបាលមិនបានគេងអេះពោះ ដើរតែខ្ចីលុយគេទេ ៣ខែនេះ គឺបានធ្វើគោលនយោបាយ ចេញគោលការណ៍ច្រើន សម្ពោធសមិទ្ធផលច្រើន និងដាក់គោលនយោបាយដើម្បីបន្តទៀតច្រើន គ្រប់វិស័យទាំងអស់ ហើយថ្ងៃនេះគឺពាក់ព័ន្ធហេដ្ឋារចនាសម្ព័ន្ធ ដើម្បីបង្កើតសរសៃឈាម នាំឈាមឱ្យប្រជាពលរដ្ឋ»។