កូរ៉េខាងជើងអះអាងថាបានដាក់ផ្កាយរណបចារកម្មដំបូងរបស់ខ្លួន
សេអ៊ូល៖ កូរ៉េខាងជើង នៅថ្ងៃពុធនេះ បានបញ្ជាក់ថា ខ្លួនបានដាក់ផ្កាយរណបចារកម្មដំបូងរបស់ខ្លួន ទៅក្នុងគន្លងតារាវិថី ហើយប្តេជ្ញាថានឹងបាញ់បង្ហោះបន្ថែមទៀត ដើម្បីការពារប្រឆាំងនឹងអ្វីដែលខ្លួនហៅថា សមយុទ្ធយោធាដ៏គ្រោះថ្នាក់របស់សត្រូវ។
ផ្កាយរណបនេះមានឈ្មោះថា “Malligyong-1” ត្រូវបានបាញ់បង្ហោះកាលពីល្ងាចថ្ងៃអង្គារ នៅលើគ្រាប់រ៉ុក្កែតដឹកជញ្ជូនថ្មី “Chollima-1” នេះបើយោងតាមទីភ្នាក់ងារសារព័ត៌មានរដ្ឋកូរ៉េ (KCNA)។
របាយការណ៍របស់ KCNA បានលើកឡើងថា ការបាញ់បង្ហោះផ្កាយរណបឈ្លបយកការណ៍ គឺជាសិទ្ធិស្របច្បាប់របស់កូរ៉េខាងជើង ក្នុងការពង្រឹងសិទ្ធិរបស់ខ្លួនក្នុងការការពារខ្លួន។
ទាំងកូរ៉េខាងត្បូង សហរដ្ឋអាមេរិក និងជប៉ុន ដែលសុទ្ធតែកំពុងជួបប្រទះភាពតានតឹងផ្នែកយោធាជាមួយកូរ៉េខាងជើង មិនអាចបញ្ជាក់បានថា ផ្កាយរណបបានហោះចូលក្នុងគន្លងតារាវិថីនោះទេ។
ប៉ុន្តែកូរ៉េខាងត្បូងបានហៅការបាញ់បង្ហោះនេះថាជា ការបំពានយ៉ាងច្បាស់ នៃដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដែលហាមឃាត់ប្រទេសកូរ៉េខាងជើងពីការប្រើប្រាស់បច្ចេកវិទ្យាមីស៊ីលផ្លោង។
ប្រភព៖ CNA
ប្រែសម្រួលដោយ៖ ហៃ ឆៃមុីនាង
