ឧត្តមសេនីយ៍ឯក ហោ សំអាត ដឹកនាំក្រុមការងារចុះប្រចាំការនៅទីបញ្ជាការស្រាលប្រទីបក្រសួងមហាផ្ទៃ ក្នុងព្រះរាជពិធីបុណ្យអុំទូក
ភ្នំពេញ៖ នាថ្ងៃចន្ទ ទី២៧ ខែវិច្ឆិកា ឆ្នាំ២០២៣នេះ ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ និងជាអនុប្រធានគណៈកម្មការរៀបចំចាត់ចែងការបណ្តែតប្រទីបរបស់ក្រសួងមហាផ្ទៃ បានដឹកនាំក្រុមការងារចុះប្រចាំការក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ថ្ងៃទី២ នៅទីបញ្ជាការស្រាលប្រទីបក្រសួងមហាផ្ទៃ។
ដូចទៅនឹងថ្ងៃទី០១ ម្សិលមិញដែរ ប្រទីបរបស់ក្រសួងមហាផ្ទៃ បានចូលរួមបណ្តែតជាមួយនឹងប្រទីបរបស់ក្រសួងផ្សេងៗក្រោមព្រះរាជវត្តមានដ៏ខ្ពង់ខ្ពស់បំផុត សម្តេចព្រះបរមនាថ នរោត្តម សីហនុមី ព្រះមហាក្សត្រនៃព្រះរាជាណាចក្រកម្ពុជា បានទត និងប្រមុខរាជរដ្ឋាភិបាល ថ្នាក់ដឹកនាំជាន់ខ្ពស់ក្នុងជួររាជរដ្ឋាភិបាល ភ្ញៀវជាតិ និងភ្ញៀវអន្តរជាតិ បានទស្សនាគឺបង្ហាញនូវសម្រស់គួរជាទីទាក់ទាញបំផុត។
សូមជម្រាបជូនដែរថា ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនៅរាជធានីភ្នំពេញពីថ្ងៃទី២៦-២៨ ខែវិច្ឆិកា ឆ្នាំ២០២៣ មានទូកចូលរួមប្រកួតចំនួន៣៣៨ទូក និងប្រទីបរបស់បណ្តាក្រសួងស្ថាប័ននានាមានចំនួន៣០ប្រទីប។ បន្ទាប់ពីខកខានដោយជំងឺកូវីដអស់រយៈពេល៣ឆ្នាំមកនេះ សម្រាប់ឆ្នាំ២០២៣នេះពិតជាមានភាពអធិកអធមនិងសប្បាយរីករាយយ៉ាងក្រៃលែង ព្រោះមានទាំងភ្ញៀវជាតិ និងអន្ដរជាតិដើរកំសាន្ដមានចំនួនរហូតរាប់លាននាក់ ៕
