លោកជំទាវ ពុំ ចន្ទីនី ទទួលជួបសំណេះសំណាល និងទទួលអំណោយពីគណបក្សចំនួន៥គឺ ដោយបក្សនីមួយៗ ឧបត្ថម្ភថវិកា ១,៥លានរៀល និងអង្ករ១តោន
ភ្នំពេញ៖ លោកជំទាវ ពុំ ចន្ទីនី អគ្គលេខាធិការ បានទទួលជួបសំណេះសំណាល និងទទួលអំណោយពីគណបក្សចំនួន ៥គឺ គណបក្សឯកភាពជាតិខ្មែរ គណបក្សមូលីណាកា គណបក្សនគរប្រជាធិបតេយ្យ គណបក្សកម្លាំងប្រជាធិបតេយ្យ និងគណបក្សធម្មាធិបតេយ្យ ដោយគណបក្សនីមួយៗបានឧបត្ថម្ភថវិកាចំនួន ១,៥០០,០០០រៀល និងអង្ករ១តោន។ ពិធីនេះប្រារព្ធធ្វើឡើងនៅទីស្នាក់ការកណ្តាលកាកបាទក្រហមកម្ពុជា នៅថ្ងៃទី៨ ខែធ្នូ ឆ្នាំ២០២៣ ។
ក្នុងឱកាសនេះ លោកជំទាវអគ្គលេខាធិការ បានផ្តាំផ្ញើសួរសួរសុខទុក្ខ និងថ្លែងអំណរគុណពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគណបក្សទាំងអស់បានផ្តល់អំណោយជូនកាកបាទក្រហមកម្ពុជា ដើម្បីជួយប្រជាពលរដ្ឋរងគ្រោះនិងងាយរងគ្រោះបំផុត។
លោកជំទាវអគ្គលេខាធិការ បានបន្ថែមទៀតថា “ការផ្តល់អំណោយជូនប្រជាពលរដ្ឋរងគ្រោះ និងងាយរងគ្រោះបំផុត មិនដូចគណបក្ស១ដងមួយភូមិនោះទេ គឺកាកបាទក្រហមកម្ពុជា ត្រូវជ្រើសរើសនិងកំណត់ថា ប្រជាពលរដ្ឋដែលរងគ្រោះ និងងាយរងគ្រោះដែលត្រូវការឱ្យជួយពិតប្រាកដមែន”។
ជាមួយគ្នានេះ តំណាងគណបក្សទាំង៥ ថ្លែងអំណរគុណ ដែលបានអញ្ញាតឲ្យយើងខ្ញុំទាំងអស់បានចូលរួមការងារមនុស្សធម៌កាកបាទក្រហមកម្ពុជា ព្រោះបានមើលឃើញនូវសកម្មភាពមនុស្សរបស់កាកបាទក្រហមកម្ពុជា ក្រោមការដឹកនាំរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ពិតជាបានដល់ដៃប្រជាពលរដ្ឋមែន។
លោកបានបញ្ជាក់ទៀតថា “ការធ្វើនយោបាយ មិនមែនជាការលាបពណ៌ឱ្យគ្នាទៅវិញទៅមកនោះទេ ការធ្វើនយោបាយ គឺជាការគិតគូដល់សុខទុក្ខ និងផលប្រយោជន៍របស់ប្រជាពលរដ្ឋជាធំ ហើយយើងនឹងចូលរួមបន្តទៀត រៀងរាល់២ខែម្តងយើងទាំងអស់គ្នាឧបត្ថម្ភ១លានរៀល”៕
