អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បន្តរៀបចំកិច្ចប្រជុំពិនិត្យសេចក្តីព្រាងតួនាទីភារកិច្ចការិយាល័យនៃនាយកដ្ឋានចំណុះ

ភ្នំពេញ៖ នៅថ្ងៃចន្ទ ទី១១ ខែធ្នូ ឆ្នាំ២០២៣ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បន្តរៀបចំកិច្ចប្រជុំពិនិត្យសេចក្តីព្រាងតួនាទីភារកិច្ចការិយាល័យនៃនាយកដ្ឋានចំណុះចំនួន២ ក្រោមអធិបតីភាព ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ ដោយមានការអញ្ជើញចូលរួមពី ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ជាច្រើនរូបផងដែរ។

ឯកឧត្តម ឧត្តមសេនីយ៍ឯក អគ្គនាយក បានមានប្រសាសន៍ថា កិច្ចប្រជុំថ្ងៃនេះគឺរួមគ្នាពិនិត្យ និងពិភាក្សាលើចំណុចដែលត្រូវកែសម្រួលស្របតាមស្មារតីអង្គប្រជុំ កាលពីសប្ដាហ៍មុន ក្នុងន័យស្ថាបនា និងកែសម្រួលតួនាទីភារកិច្ចឱ្យមានភាពសុក្រឹត្យ ច្បាស់លាស់ និងចៀងវាងនូវចន្លោះប្រហោងនានា មុននឹងបន្តដាក់ជូនថ្នាក់ដឹកនាំពិនិត្យ។

ឆ្លៀតក្នុងឱកាសនោះ ឯកឧត្តម ឧត្តមសេនីយ៍ឯក អគ្គនាយក ក៏បានគូសបញ្ជាក់ថា ក្រុមការងារត្រូវមានការចាប់អារម្មណ៍ខ្ពស់ទៅលើកិច្ចការងារឌីជីថលនានា ជាពិសេសត្រូវមានការយកចិត្តទុកដាក់ខ្ពស់ និងសិក្សាស្វែងយល់ឱ្យកាន់តែទូលំទូលាយលើបញ្ហាបច្ចេកវិទ្យាឌីជីថល។ បន្ថែមពីនេះ ឯកឧត្តម ឧត្តមសេនីយ៍ឯក អគ្គនាយក បានសង្កត់ធ្ងន់ថា រាល់ការអនុវត្តការងារតម្រូវឱ្យមានភាពស្មោះត្រង់ ប្រើប្រាស់ធនធាន ជាពិសេសធនធានមនុស្សឱ្យអស់លទ្ធភាព ដើម្បីធ្វើយ៉ាងណាឱ្យការងារទទួលបានលទ្ធផលតាមការរំពឹងទុក ប្រកបដោយប្រសិទ្ធភាពខ្ពស់។

ឯកឧត្តម ឧត្តមសេនីយ៍ឯក អគ្គនាយក បានណែនាំឱ្យក្រុមការងារកែសម្រួលសេចក្តីព្រាងតួនាទីភារកិច្ចការិយាល័យនៃនាយកដ្ឋានចំណុះ ឱ្យបានគ្រប់ជ្រុងជ្រោយ និងទាន់ពេលវេលា ដោយមានមានអំណះអំណាងមូលដ្ឋានច្បាស់លាស់រាល់ការប្រើប្រាស់ពាក្យពេចន៍នានា ៕