ឯកឧត្តម ប៉ែន បូណា៖ រាជរដ្ឋាភិបាល ដឹកនាំដោយបក្សប្រជាជន ធ្វើកិច្ចការយ៉ាងសកម្ម ក្នុងការស្តារប្រជាធិបតេយ្យ និងសិទ្ធិមនុស្សនៅកម្ពុជា
ភ្នំពេញ៖ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានលើកឡើថា រាជរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខ ហើយឥឡូវនេះ ដឹកនាំដោយសម្តេចធិបតី ហ៊ុន ម៉ាណែត គឺជារាជរដ្ឋាភិបាលដែលបានធ្វើកិច្ចការយ៉ាងសកម្មនៅក្នុងការស្តារប្រជាធិបតេយ្យ និងសិទ្ធិមនុស្សនៅក្នុងប្រទេសកម្ពុជា។
ឯកឧត្តម ប៉ែន បូណា បានមានប្រសាសន៍នៅរសៀល ថ្ងៃទី១២ ខែធ្នូនេះថា ក្រុមអ្នកដែលកំពុងតែស្រែកទាមទារឱ្យកម្ពុជាស្តារប្រជាធិបតេយ្យ និងសិទ្ធិមនុស្សមួយក្តាប់តូចនោះឱ្យបានជ្រាបថា រាជរដ្ឋាភិបាលកម្ពុជាដែលដឹកនាំដោយគណបក្សប្រជានកម្ពុជា ដែលមានសម្តេចធិបតី ហ៊ុន សែន ជាប្រមុខ ហើយឥឡូវនេះ ដឹកនាំដោយសម្តេចធិបតី ហ៊ុន ម៉ាណែត គឺជារាជរដ្ឋាភិបាលដែលបានធ្វើកិច្ចការយ៉ាងសកម្ម ជាជើងឯកនៅក្នុងការស្តារប្រជាធិបតេយ្យ និងសិទ្ធិមនុស្សនៅក្នុងប្រទេសកម្ពុជា។
ដូចដឹងស្រាប់ហើយថា ចេញពីចំណុចសូន្យនៃរបបខ្មែរក្រហមដែលបានបំផ្លាញប្រជាធិបតេយ្យ និងសិទ្ធិមនុស្សទាំងស្រុងនោះ ឥឡូវនេះយើងបាននាំមកនូវសិទ្ធិរស់រានមានជីវិតនាំមកនូវសិទ្ធិសេរីភាពគ្រប់បែបយ៉ាង នាំមកនូវប្រជាធិបតេយ្យ សេរី ពហុបក្ស ដែលប្រជាពលរដ្ឋខ្មែរកំពុងរស់នៅទទួលផលប្រយោជន៍ពីសុខសន្តិភាព ពីការអភិវឌ្ឍន៍ប្រទសក្នុងភាពំបូរសប្បាយ។ បែរជាមានក្រុមមនុស្សមួយក្តាប់តូចស្រែកទាមទាររកប្រជាធិបតេយ្យ សិទ្ធិមនុស្ស ហើយនឹងកំពុងស្រែកទាមទារឱ្យដោះលែងអ្នកដែលប្រព្រឹត្តខុសច្បាប់។
អ្នកនាំពាក្យរាជរដ្ឋាភិបាលបានបញ្ជាក់ថា “កម្ពុជាមានប្រជាធិបតេយ្យ សេរី ពហុបក្ស ស្របតាមរដ្ឋធម្មនុញ្ញកម្ពុជា មានការគោរពសិទ្ធិមនុស្ស និងលើកស្ទួយសិទ្ធិមនុស្សដែលរាជរដ្ឋាភិបាលបាននឹងកំពុងបន្តអនុវត្ត និងលើកស្ទួយបន្តទៅទៀត ធ្វើម៉េចឱ្យប្រទេសកម្ពុជាកាន់តែរីកចម្រើនសំបូរសប្បាយ ប្រជាពលរដ្ឋមានកិត្តិយស និងសេចក្តីថ្លៃថ្នូរ។ ដូច្នេះប្រទេសកម្ពុជាកំពុងតែកសាងនីតិរដ្ឋ បានន័យថា អ្វីៗត្រូវប្រព្រឹត្តទៅនៅក្នុងក្របខណ្ឌច្បាប់ រដ្ឋធម្មនុញ្ញ និងច្បា់ពាក់ព័ន្ធផ្សេងៗទៀត ដើម្បីពង្រឹងកសាងនីតិរដ្ឋឱ្យកាន់តែរឹងមាំ។ នេះជាកិច្ចការដែលរាជរដ្ឋាភិបាល បាននិងកំពុងធ្វើ ហើយប្រជាពលរដ្ឋកំពុងតែទទួលផលពីសុខសន្តិភាព ពីការអនុវត្តច្បាប់ និងពីការសេរីភាពសិទ្ធិមនុស្សដែលកំពុងកើតមាននៅក្នុងប្រទេសកម្ពុជា ហើយកំពុងតែរឹងមាំជាលំដាប់”៕
