សេចក្តីព្រាងច្បាប់ស្តីពី “ប្រព័ន្ធទឹកកខ្វក់” ត្រូវបានពិនិត្យ និងពិភាក្សាដោយក្រុមប្រឹក្សាសេដ្ឋកិច្ច សង្គមកិច្ច និងវប្បធម៌

ភ្នំពេញ៖ ពីថ្ងៃទី១២-១៣ ខែធ្នូ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំគណ:ប្រតិភូក្រសួងអញ្ជើញចូលរួមកិច្ចប្រជុំកម្រិតបច្ចេកទេស ដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពី “ប្រព័ន្ធទឹកកខ្វក់” នៅទីស្ដីការគណៈរដ្ឋមន្ត្រី ក្រោមអធិបតីភាពឯកឧត្ដម លីវ សុវណ្ណា អនុប្រធាន និងជាប្រធានក្រុមការងារទី៤ នៃក្រុមប្រឹក្សាអ្នកច្បាប់ និងឯកឧត្ដម អ៊ូច ថោងសេង សមាជិកអចិន្ត្រៃយ៍ និងជាប្រធានក្រុមទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។

អង្គប្រជុំបានឯកភាពលើការកែសម្រួលទម្រង់ ខ្លឹមសារ និងពាក្យពេចន៍ ដល់ត្រឹមជំពូកទី១ បន្តកិច្ចពិភាក្សាជំពូកទី២ នៅថ្ងៃស្អែក ទី១៣ ខែធ្នូ ឆ្នាំ២០២៣ និងឯកភាពរក្សាទុកត្រេទី១ និងត្រេទី៤ នៃមាត្រា៦ (ចាស់) ជូនក្រសួងសាមីពិនិត្យ និងពិចារណាឡើងវិញ។

បន្ថែមពីលើនេះ អង្គប្រជុំក៏បានឯកភាពលុបមាត្រា៥ និងកែសម្រួលទម្រង់ ខ្លឹមសារ និងពាក្យពេចន៍ ដល់ត្រឹមផ្នែកទី១ នៃជំពូកទី៤ និងបន្តកិច្ចប្រជុំពិភាក្សាដែលកាលបរិច្ឆេទនៃកិច្ចប្រជុំនឹងត្រូវជូនដំណឹង នាពេលក្រោយ៕