នាយឧត្តមសេនីយ៍ កែវ វណ្ណថន ទទួលជួបពិភាក្សាការងារជាមួយ លេខាទី១ នៃស្ថានទូតអ៊ុយក្រែន

ភ្នំពេញ៖ នាព្រឹកថ្ងៃអង្គារ ៧ កើត ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៩ ខែធ្នូ ឆ្នាំ២០២៣នេះ ឯកឧត្តម នាយឧត្តមសេនីយ៍ កែវ វណ្ណថន អគ្គនាយករង តំណាង ឯកឧត្តម អគ្គនាយកអន្តោប្រវេសន៍ បានទទួលជួបពិភាក្សាការងារជាមួយ លោក Oleksandr Hyshtymult លេខាទី១ នៃស្ថានទូតអ៊ុយក្រែននៅទីក្រុងហាណូយទទួលបន្ទុកកិច្ចការកុងស៊ុលដែលទើបតែងតាំងថ្មី។

ជាកិច្ចចាប់ផ្តើម លោកលេខាទី១ បានបញ្ជាក់ពីគោលបំណងនៃជំនួប ដើម្បីណែនាំខ្លួនជាលេខាទី១ទើបតែងតាំងថ្មីកាលពីខែកញ្ញា ឆ្នាំ២០២៣ និងស្នើបន្តពង្រឹងទំនាក់ទំនងកិច្ចសហប្រតិបត្តិការបន្តទៀតជាមួយអគ្គនាយកដ្ឋានអន្តោប្រវេសន៍។

ជាការឆ្លើយតប ឯកឧត្តម នាយឧត្តមសេនីយ៍ កែវ វណ្ណថន ជំនួសមុខឯកឧត្តម អគ្គនាយកអន្តោប្រវេសន៍ សូមស្វាគមន៍លោកលេខាទី១ និងឯកភាពបន្តពង្រឹងទំនាក់ទំនងកិច្ចសហប្រតិបត្តិការល្អទៅវិញទៅមក និងផ្លាស់ប្តូរព័ត៌មានពាក់ព័ន្ធនឹងពលរដ្ឋអ៊ុយក្រែននៅកម្ពុជា ដើម្បីមានមូលដ្ឋានក្នុងការវាយតម្លៃ និងផ្តល់សេវាចាំបាច់នានាពាក់ព័ន្ធនឹងកិច្ចការងារអន្តោប្រវេសន៍ ៕