ឯកឧត្តម រស់ វរុណ ដឹកនាំកិច្ចប្រជុំអនុគណៈកម្មធិការពិធីការ ត្រៀមរៀបចំសន្និបាទត្រួតពិនិត្យ លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ
ភ្នំពេញ៖ ឯកឧត្តម រស់ វរុណ រដ្ឋលេខាធិការក្រសួងមហាផ្ទៃ និងជាប្រធានអនុគណៈកម្មការពិធីការ និងកិច្ចការរដ្ឋបាល នាថ្ងៃទី២១ ខែធ្នូ ឆ្នាំ២០២៣ បានអញ្ជើញជាអធិបតីដឹកនាំកិច្ចប្រជុំអនុគណៈកម្មធិការពិធីការ ដើម្បីត្រៀមរៀបចំសន្និបាទត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងមហាផ្ទៃ និងលទ្ធផលការងារប្រឡងប្រណាំងអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព ដោយមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ព្រមទាំងមន្ត្រីពាក់ព័ន្ធជាសមាជិកក្រុមការងារនៃអនុគណៈកម្មការពិធីការ និងកិច្ចការរដ្ឋបាល ដើម្បីត្រៀមរៀបចំសន្និបាទត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងមហាផ្ទៃ ផងដែរ។
ឯកឧត្តម ប្រធានអនុគណៈកម្មការពិធីការ និងកិច្ចការរដ្ឋបាល បានមានប្រសាសន៍ថា ការរៀបចំកិច្ចប្រជុំនាពេលនេះដើម្បីពិភាក្សាបែងចែកតួនាទី ភារកិច្ច ផ្នែកពិធីការដើម្បីត្រៀមលក្ខណៈឱ្យបានទាន់ពេល និងឱ្យបានល្អបំផុតសម្រាប់ការងារសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងមហាផ្ទៃ និងលទ្ធផលការងារប្រឡងប្រណាំងអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព ដែលនឹងត្រូវរៀបចំឡើងរយៈពេល២ថ្ងៃនៅដើមឆ្នាំ២០២៤ខាងមុខ។
ឯកឧត្តម បានលើកឡើងបន្ថែមថា សន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងមហាផ្ទៃ នឹងអាចមានអ្នកចូលរួមប្រមាណ ៨០០នាក់។ ក្នុងន័យនេះ ឯកឧត្តម បានបញ្ជាក់ថា ដើម្បីឆ្លើយតបនឹងលំហូរការងារ អនុគណៈកម្មការ មានភារកិច្ចត្រូវធ្វើកិច្ចការងារពាក់ព័ន្ធជាច្រើន រួមមាន៖ ការរៀបចំលិខិតអញ្ជើញសមាសភាពដើម្បីចូលរួម, ការរៀបចំកិច្ចការងារពិធីការ និងបដិសណ្ឋារកិច្ច, ការងារផ្គត់ផ្គង់ និងការងារពាក់ព័ន្ធជាច្រើនទៀត។
ឯកឧត្តម រដ្ឋលេខាធិការក្រសួងមហាផ្ទៃ និងជាប្រធានអនុគណៈកម្មការពិធីការ និងកិច្ចការរដ្ឋបាល បានមានប្រសាសន៍ណែនាំដល់ក្រុមការងារនៃអនុគណៈកម្មការត្រូវពិភាក្សាជាមួយភាគីពាក់ព័ន្ធ ដើម្បីអាចរៀបចំកិច្ចការងារបានគ្រប់ជ្រុងជ្រោយ និងរៀបចំការងារចំពោះមុខឱ្យបានរួចជាស្រេច ធ្វើយ៉ាងណាឱ្យការរៀបចំសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងមហាផ្ទៃប្រព្រឹត្តទៅដោយរលូន និងទទួលបានជោគជ័យខ្ពស់៕
