ឯកឧត្តម គួច ចំរើន អញ្ជើញជាអធិបតីក្នុងពិធីសម្ភោធបើកដំណើរការ DV PAY សាខាខេត្តព្រះសីហនុ

ភ្នំពេញ៖ នាព្រឹកថ្ងៃទី២៤ ខែធ្នូ ឆ្នាំ២០២៣ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញជាអធិបតីក្នុងពិធីសម្ភោធបើកដំណើរការ DV PAY សាខាខេត្តព្រះសីហនុ ស្ថិតនៅសង្កាត់លេខ៤ ក្រុងព្រះសីហនុ ដោយមានការចូលរួមពីលោកអភិបាលរងខេត្ត អភិបាលក្រុងព្រះសីហនុ និងប្រធានមន្ទីរអង្គភាពពាក់ព័ន្ធ។

ឯកឧត្តម គួច ចំរើន អភិបាលខេត្ត មានប្រសាសន៍បើកឱ្យដំណើការ DV PAY សាខាខេត្តព្រះសីហនុ ជាផ្លូវការនាពេលនេះ ស្របពេលដែលអ្នកវិនិយោគទុនមានជំនឿជឿជាក់មកលើរាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិតដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ តាមរយៈកិច្ចខិតខំប្រឹងប្រែងរបស់ប្រមុខរាជរដ្ឋាភិបាលបានធ្វើឱ្យខេត្តព្រះសីហនុ មានការអភិវឌ្ឍផ្លាស់ប្តូរយ៉ាងឆាប់រហ័ស ពិសេសលើផ្នែកហេដ្ឋារចនាសម្ព័ន្ធអគារខ្ពស់ៗ សណ្ឋាគារ និងតំបន់ពាណិជ្ជកម្មជាច្រើន។ តំបន់សេដ្ឋកិច្ចពិសេស កំពង់ផែសមុទ្រទឹកជ្រៅ អាកាសយានដ្ឋានអន្តរ ជាតិ ផ្លូវល្បឿនលឿន រមណីយដ្ឋានធម្មជាតិ ជីវៈចម្រុះដ៏សម្បូរបែប ព្រម ទាំងឆ្នេរសមុទ្រ កោះដ៏ស្រស់ស្អាតត្រូវបានប្រសិទ្ធនាមជា “តារារៈនាទិសនិរតី” បាននឹងកំពុងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច និងវិស័យទេសចរណ៍នៅក្នុងខេត្ត ទាក់ទាញភ្ញៀវទេសចរមកកម្សាន្តសប្បាយយ៉ាងច្រើនកុះករ។ ទន្ទឹមនោះការងារសន្តិសុខ សណ្តាប់ធ្នាប់ សុវត្ថិភាពសាធារណៈ ជាពិសេសការអនុវត្តនូវគោលនយោបាយ «ភូមិ ឃុំ សង្កាត់មានសុវត្ថិភាព» ឱ្យកាន់តែមានប្រសិទ្ធភាព គណៈបញ្ជាការឯកភាពរដ្ឋបាលខេត្តព្រះសីហនុ ប្ដេជ្ញាប្រយុទ្ធប្រឆាំងជាមួយឧក្រិដ្ឋជនជួញដូរមនុស្ស ជួញដូរគ្រឿងញៀន ជួញដូរអាវុធ បង្ខាំងមនុស្ស និងបទល្មើសផ្សេងទៀត ដើម្បីធានាឱ្យខេត្តមានសន្តិសុខ សុវត្ថិភាពដល់ការរស់នៅបានសុខស្រួលទាក់ទាញការវិនិយោគ និងទេសចរណ៍នាពេលខាងមុខ។

ឯកឧត្តមអភិបាលខេត្ត បានថ្លែងអំណរគុណក្រុមហ៊ុន DV PAY បានពង្រីកខ្លួនលើផ្នែកសេវាកម្មជាបន្តបន្ទាប់ និងជាអ្នកផ្តល់សេវាកម្មហិរញ្ញវត្ថុយ៉ាងសំខាន់សម្រាប់អតិថិជន ព្រមទាំងបានកោតសរសើ និងលើកទឹកចិត្ត និងស្មារតីដែលក្រុមហ៊ុន DV PAY កំពុងបានអនុវត្ត ស្របនឹងគោលនយោបាយរបស់រាជរដ្ឋាភីបាលអាណត្តិទី៧ ដែលបានដាក់ចេញនូវបច្ចេកវិទ្យាឌីជីថល តាមរយៈការចាយលុយ និងការរក្សាសុវត្ថិភាពលុយ សេវាកម្មទូទាត់សាច់ប្រាក់មានការកើនឡើង ដើម្បីពង្រឹងគុណភាព សមត្ថភាពដល់អតិថិជនជាអ្នកប្រើប្រាស់ និងបានចូលរួមជួយជំរុញកំណើនសេដ្ឋកិច្ច ផ្តល់ការងារជូនប្រជាពលរដ្ឋ រួមចំណែកផ្តល់ភាពងាយស្រួលលឿន ឆាប់ និងសុវត្ថិភាពសាច់ប្រាក់បានថែមទៀត និងសូមឱ្យក្រុមហ៊ុន DV PAY សាខាខេត្តព្រះសីហនុ ទទួលបានជោគជ័យក្នុងប្រតិបត្តិការរបស់ខ្លួន និងមានការគាំទ្រយ៉ាងច្រើនឡើងពីអតិថិជននាពេលខាងមុខ ៕