ក្នុងឆ្នាំ២០២៣ ការិយាល័យច្រកចេញចូលតែមួយរបស់រដ្ឋបាលក្រុងស្ទឹងត្រែង ផ្តល់សេវាបានចំនួន ជិត១ម៉ឺនសេវា ដែលមានថវិកាសរុបជាង ៦៣លានរៀល

ភ្នំពេញ៖ លោក សាយ កុសល អភិបាលក្រុងស្ទឹងត្រែង បានបញ្ជាក់ថា ក្នុងឆ្នាំ២០២៣នេះ គិតត្រឹមថ្ងៃទី២៥ ខែធ្នូ ការិយាល័យច្រកចេញចូលតែមួយ ផ្តល់សេវាបាន ៩.៨៩២សេវា ដែលមានថវិកាសរុបចំនួន ៦៣.៦០០.០០០រៀល។

នៅក្នុងកិច្ចសម្ភាសន៍ផ្ដាច់មុខជាមួយ អង្គភាពសារព័ត៌មាន Hotnews Asia នៅថ្ងៃទី២៦ ខែធ្នូ ឆ្នាំ២០២៣នេះ លោក សាយ កុសល អភិបាលក្រុងស្ទឹងត្រែង បានបញ្ជាក់ថា ការផ្តល់សេវាចកចេញចូលតែមួយរបស់រដ្ឋបាលក្រុងស្ទឹងត្រែង មានចំនួន ១៣វិស័យ មានដូចជា៖ វិស័យនីត្យានុកូលកម្ម, វិស័យអត្រានុកូលដ្ឋាន, វិស័យទេសចរណ៍, វិស័យវប្បធម៌, វិស័យពាណិជ្ជកម្ម, វិស័យរ៉ែ និងថាមពល, វិស័យឧស្សាហកម្ម, វិស័យកសិកម្ម, វិស័យសុខាភិបាល, វិស័យអប់រំ, វិស័យសំណង់, វិស័យសូរិយោដី រួមទាំងការងាររដ្ឋបាល និងសាធារណការ។

លោកបន្ថែមថា របស់រដ្ឋបាលក្រុងស្ទឹងត្រែងប្តេជ្ញាចិត្ត ក្នុងការផ្តល់សេវាជូនប្រជាពលរដ្ឋ ហើយកន្លងមកនេះក្រុងស្ទឹងត្រែង បានដំណើរការច្រកចេញចូលតែមួយ អស់រយៈពេល ១១ឆ្នាំហើយ ចាប់ពីថ្ងៃទី០៥ ខែធ្នូ ឆ្នាំ២០១២ មកដល់ពេលនេះពពុំមានការប្ដឹងជំទាស់ផ្សេងៗទេ មានតែការសរសើរ និងសាទរ។ ហើយកន្លងមករដ្ឋបាលក្រុងក៏បានធ្វើការជូនដំណឹងទៅកាន់អាជីវករចាស់ដែលមានសុំសេវាដើម្បីបន្តសុំឡើងវិញ និងធ្វើការផ្សព្វផ្សាយសម្រាប់អ្នកបើកអាជីវកម្មថ្មីនូវក្នុងការស្នើសុំសេវាដែលគាត់បានបើកអាជីវកម្មផ្សេងៗដែលទាក់ទងទៅនឹងវិស័យទាំង១៣នេះ។

លោក សាយ កុសល អភិបាលក្រុងបានឲ្យដឹងទៀតថា រដ្ឋបាលក្រុងក៏មានយន្តការក្នុងការជំរុញតាមដានរបស់មន្ត្រីតាមរយៈការបរិច្ឆេទ៖ ទី១.រាល់ឯកសារទាំងអស់គឺចុះតាមប្រព័ន្ធ System និងទី២.ការចុះកាលបរិច្ឆេទទៅលើថ្ងៃខែនៃការស្នើសុំរបស់អតិថិជន ហើយនៅពេលដែលកំណត់បង្ហាញរឿង លោក បានបញ្ជាក់ទៅអ្នកពាក់ព័ន្ធ ជាពិសេសប្រធានច្រក និងនាយករដ្ឋបាលក្រុង គឺអនុវត្តទៅតាមនីតិវិធីច្បាប់ ហើយនិងមានការប្រគល់សិទ្ធិជូនដល់អភិបាលរងក្រុងទាំង៦រូប មានសិទ្ធិចចុះហត្ថលេខាទៅលើការងារនីត្យានុកូលកម្ម និងអត្រានុកូលដ្ឋាន៕