ឯកឧត្តម គួច ចំរើន នាំយកអំណោយសង្គ្រោះសម្តេចកិត្តិព្រឹទ្ធបណ្ឌិតចែកជូនប្រជាពលរដ្ឋរងគ្រោះដោយខ្យល់កន្ត្រាក់ ជាង១ពាន់ គ្រួសារនៅស្រុកព្រៃនប់
ភ្នំពេញ៖ នៅរសៀលថ្ងៃទី២៦ ខែធ្នូ ឆ្នាំ២០២៣ ឯកឧត្តម គួច ចំរើន ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ មន្ត្រីសាខាអនុសាខា និងអ្នកស្ម័គ្រចិត្ត នាំយកអំណោយសង្គ្រោះរបស់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែនប្រធានកាកបាទក្រហមកម្ពុជា ចែកជូនប្រជាពលរដ្ឋរង គ្រោះដោយខ្យល់កន្រ្តាក់នៅក្នុងស្រុកព្រៃនប់ចំនួន ១.១៦៥ខ្នងផ្ទះ នៅភូមិព្រែកទាល ឃុំទឹកថ្លា ស្រុកព្រៃនប់ ដោយមានការចូលរួមពីឯកឧត្តម អ្នកតំណាងរាស្ត្រលោកជំទាវ យឹម ឆៃលីន ហ៊ុន ម៉ានី អ្នកឧកញ៉ា គៀង ស្រីនាង ទ្រី ភាព លោកជំទាវ ហេង គីមជី ទៀ វិចិត្រ ឯកឧត្តម លោកជំទាវ អ្នកឧកញ៉ា លោកឧញ៉ា សប្បុរសជន លោកប្រធានមន្ទីរ អង្គភាពពាក់ព័ន្ធ និងអាជ្ញាធរស្រុកព្រៃនប់។
ឯកឧត្តម គួច ចំរើន ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ បានពាំនាំប្រសាសន៍ផ្តាំផ្ញើសួរសុខទុក្ខ និងចូលរួមចែករំលែកការលំបាករបស់បងប្អូនប្រជាពលរដ្ឋពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋនៅក្នុងស្រុកព្រៃនប់។
ឯកឧត្តមបន្តថា ភូមិសាស្ត្ររបស់យើងបង្កគ្រោះថ្នាក់ប៉ះពាល់ដល់ប្រជាពលរដ្ឋក្នុងឆ្នាំ២០២៣ បងប្អូននៅទីនេះតែងតែរងគ្រោះធម្មជាតិជារៀងរាល់ឆ្នាំដើមឆ្នាំ និងចុងឆ្នាំ ពិតហើយបងប្អូនដែលរងផលប៉ះពាល់ដោយសារខ្យល់កន្ត្រាក់ដែលជួបបញ្ហាប្រឈម។ ដោយបានទទួលពត៌មានពីអាជ្ញាធរស្រុកព្រៃនប់ បានដាក់ចេញបទបញ្ជាឲ្យអាជ្ញាធរស្រុកចាត់ចែងជួយសង្គ្រោះបង ប្អូនប្រជាពលររដ្ឋ និងក្រុមគ្រូពេទ្រមកប្រចាំកានៅទីនេះ ដើម្បីជួយសង្គ្រោះក្នុងនាមរដ្ឋបាលខេត្ត ។ សូមអគុណអាជ្ញាធរ និងកងកម្លាំង ក៏ដូចជាអ្នកស្ម័គ្រចិត្តកាកបាទក្រហម ពួកគាត់បានខិតខំប្រឹងប្រែង និងចុះស្រង់ស្ថិតិប្រជាពលរដ្ឋរងគ្រោះ។ កាលពីថ្ងៃទី២៤ យើងបានចែកជូនបងប្អូនរបស់យើងនៅឃុំសាមគ្គីចំនួន ៤៦៧ គ្រួសារម្តងរួមមកហើយ។
ទន្ទឹមនោះឯកឧត្តមក៏បានរាយការណ៍ជូនសម្តេចកិត្តិព្រឹទ្ធបណ្ឌិត សម្តេចបានធ្វើការណែនាំឲ្យរៀបចំអំណោយជាស្បៀងអាហារ សម្ភារៈ ដើម្បីយកមកធ្វើការចែកជូនបងប្អូនប្រជាពលរដ្ឋរងគ្រោះ ព្រោះយើងមិនអាចចែកម្តងបានទាំងអស់នោះទេ ។ ព្រោះគ្រោះធម្មជាតិបានចាប់ពីថ្ងៃទី២១មក ឯកឧត្តមសូមអគុណ អាជ្ញាធរ និងអ្នកស្ម័គ្រចិត្តរបស់យើងដែលបានចុះទៅដល់មូលដ្ឋាន តាមតម្រូវការអ្នករងគ្រោះ ក៏ប៉ុន្តែក្រុមការងារអ្នកស្ម័គ្រចិត្ត បានរៀបចំស្បៀង និងសម្ភារៈបានទាន់ពេលវេលាចែកជូននាពេលនេះ។
ឯកឧត្តម ប្រធានសាខា ថ្លែងអំណគុណ ឯកឧត្តម លោកជំទាវ អ្នកឧកញ៉ា លោកឧកញ៉ា និងបងប្អូនសប្បុរសជនដែលបានចូលរួមបរិច្ចាកថវិកា រៀបចំកម្មវិធីចែកអំណោយសង្គ្រោះជូនបងប្អូនប្រជាពលរដ្ឋនាពេលនេះ ដែលជាទឹកចិត្តសប្បុរសធម៌ក្នុងការជួយសង្គ្រោះជនរងគ្រោះ។
ជាមួយគ្នានេះ ឯកឧត្តមប្រធានគណ:កម្មាធិការសាខាកាកបាទក្រហមកម្ពុជាខេត្តព្រះសីហនុ សូមបងប្អូនក្តាប់ឲ្យបានបញ្ហាប្រឈម ត្រូវសាងសង់លំនៅដ្ឋានឲ្យបានរឹងមាំ មិនមានហានិភ័យពីគ្រោះថ្នាក់ដោយខ្យល់កន្រ្តាក់ បង្ករជាគ្រោះថ្នាក់អាចឈានដល់អាយុជីវិត ឆ្លើយតបនឹងស្ថានភាពភូមិសាស្ត្រ នៃការប្រែប្រួលអាកាសធាតុ និងជះឥទ្ធិពលនៃការប្រែប្រួលអាកាសធាតុ សូមឲ្យមន្ត្រីរបស់យើងបន្តវប្បធម៌ជួយប្រជាពលរដ្ឋ និងចូលរួមជាមួយកាកបាទក្រហម បន្តត្រួតពិនិត្យមើលចាស់ជរា កុមារ ឲ្យមានសុវត្ថិភាព និងបងប្អូន អាជ្ញាធរ កងកម្លាំងត្រូវត្រៀមបង្កាជួយសង្គ្រោះប្រជាពលរដ្ឋ ពិសេសចាស់ជរា និងកុមារឲ្យមានកន្លែងសុវត្ថិភាព និងត្រូវថែទំាសុខភាពមានដូចជាអាហារ និងផឹកទឹកឆ្អិនឲ្យបានត្រឹមត្រូវ ។
ឆ្លៀតក្នុងឳកាសនោះ មន្ត្រីសាខាក៏បានផ្សព្វផ្សាយ ជំងឺគ្រុនឈាម គ្រុនឈិក និងជំងឺអុតស្វា ដល់បងប្អូនប្រជាពលរដ្ឋបានរួមក្នុងថ្ងៃនេះ ឲ្យបានយល់ដឹងនូវរោគសញ្ញា និងវិធានការពារ។
ក្នុងឱកាសនោះឯកឧត្តមប្រធានគណ:កម្មាធិការសាខាកាកបាទក្រហមខេត្ត ក៏បាននាំយកអំណោយសម្តេចកិត្តិព្រឹទ្ធបណ្ឌិតចែកជូនប្រជាពលរដ្ឋរងគ្រោះចំនួន ១.១៦៥គ្រួសារ ក្នុងមួយគ្រួសារ ទទួលបានអង្ករ ២៥គីឡូក្រាម មី១កេស ទឹកត្រី១យួរ ត្រីខ១យួរ ឃីតមួយកញ្ចប់ (មុង១ ភួយ១ សារុង១ ក្រមា១) និងថវិកា ៥ម៉ឺនរៀល៕
