អភិបាលខេត្តស្ទឹងត្រែង សុំការយោគយល់ចំពោះការជួយដល់ប្រជាពលរដ្ឋដែលមានជីវភាពខ្វះខាត មិនបានគ្រប់គ្នាទាំងស្រុង ព្រោះថវិកានៃការចំណាយគឺមានកម្រិត
ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានលើកឡើងថា បានសុំការយោគយល់ ពីប្រជាពលរដ្ឋចំពោះការជួយដល់ប្រជាពលរដ្ឋដែលមានជីវភាពខ្វះខាត មិនបានគ្រប់គ្នាទាំងស្រុងទៅដល់គ្រប់ទីកន្លែង ពីព្រោះថាការចំណាយសម្ភារៈក៏ត្រូវការថវិកា ហើយថវិការគឺមានកម្រិត ដូច្នេះហើយជួយដល់បងប្អូនប្រជាពលរដ្ឋគ្រប់ក្រុមគ្រួសារ និងគ្រប់ទីកន្លែងបានទេ។
នៅក្នុងពិធីចែកអំណោយជូនប្រជាពលរដ្ឋក្រីក្រ ចាស់ជរា ស្ត្រីមេម៉ាយ ជនពិការ កុមារកំព្រា និងគ្រួសាររងផលប៉ះពាល់ពីគ្រោះធម្មជាតិឆ្នាំ២០២៣ ក្នុងស្រុកបុរីអូរស្វាយសែនជ័យ នាថ្ងៃទី២៨ ខែធ្នូ ឆ្នាំ២០២៣ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានមានប្រសាសន៍ថារាជរដ្ឋាភិបាល តែងតែគិតគូរអំពីសុខទុក្ខរបស់បងប្អូនប្រជាពលរដ្ឋ និងធ្វើយ៉ាងណាឲ្យប្រទេសកម្ពុជាមានសុខសន្តិភាព នេះជារឿងដែលសំខាន់បំផុត។ នៅពេលប្រទេសកម្ពុជារបស់យើងមានសុខសន្តិភាព នោះប្រទេសរបស់យើងនិងមានការអភិវឌ្ឍន៍លើកគ្រប់វិស័យ។
ឯកឧត្តមអភិបាលខេត្ត បន្តថា រាជរដ្ឋាភិបាលក៏បានគិតគូរអំពីការកសាងអភិវឌ្ឍន៍លើកគ្រប់វិស័យដែលជាតម្រូវការរបស់បងប្អូនប្រជាពល់រដ្ឋ រួមទាំងហេដ្ឋារចនាសម្ព័ន្ធ និងរូបវន្ត ដែលមានដូចជា៖ ផ្លូវ ស្ពាន សាលារៀន វត្តអារាម មន្ទីរពេទ្យ និងប៉ូស្តិ៍សុខភាព។ ទាំងនេះគឺជាការគិតគូររបស់រាជរដ្ឋាភិបាល ដើម្បីបម្រើផលប្រយោជន៍ជូនបងប្អូនប្រជាពលរដ្ឋនូវគ្រប់ទីកន្លែង។
ឯកឧត្តមបានបញ្ជាក់ថា “ទោះបីយើងខិតខំបន្តកន្លងមកដែលរក្សាបានលំនឹងសេដ្ឋកិច្ចចាប់ពី៤%រហូតដល់៧% ក្នុងរង្វង់ឆ្នាំ២០១៩ និង២០២០ យើងឃើញថាសេដ្ឋកិច្ចរបស់យើងបានងើបឡើងតាមការរំពឹងទុក និងការខិតខំរបស់រាជរដ្ឋាភិបាល ប៉ុន្តែយើងក៏ប្រឈមទៅនឹងស្ថានភាពមួយគឺការរីករាតត្បាតនៃជំងឺកូវីដ-១៩ ដែលធ្វើឲ្យសេដ្ឋកិច្ចរបស់ប្រទេសយើងធ្លាប់ចុះ និងប៉ះពាល់ទៅដល់ការរស់នៅរបស់បងប្អូនប្រជាពលរដ្ឋ ផ្គួបផ្សំនិងកត្តាបញ្ហាសង្រ្គាមមួយចំនួនថែមទៀតរវាងប្រទេសមហាអំណាច។ នេះមិនមែនតែត្រឹមប៉ះពាល់ដល់កម្ពុជាទេ ប៉ុន្តែវាប៉ះពាល់ទៅដល់សេដ្ឋកិច្ចនៅទូទាំងពិភពលោកតែម្តង។ ទោះជាយ៉ាងណាក៏ដោយរាជរដ្ឋាភិបាលកម្ពុជា បានខិតខំដាក់ចេញនូវវិធានការទប់ស្កាត់ និងខិតខំធ្វើយ៉ាងណាមិនឲ្យផលប៉ះពាល់នេះឡើងវិញ ដើម្បីកំណើនការងារ ដើម្បីកំណើនជីវភាព និងដើម្បីកំណើនសេដ្ឋកិច្ចរបស់យើងឡើងវិញ”។
ឯកឧត្តមអភិបាលខេត្ត បានរំលេចថា នៅពេលរងផលប៉ះពាល់រាជរដ្ឋាភិបាល ត្រូវការគិតគូរអំពីជីវភាព និងការរស់នៅរបស់បងប្អូនប្រជាពលរដ្ឋ តាមរយៈការផ្ដល់ឧបត្ថម្ភសាច់ប្រាក់ដល់គ្រួសារក្រីក្រនៅទូទាំងព្រះរាជាណាចក្រកម្ពុជា។ រាជរដ្ឋាភិបាល ក៏នៅតែផ្ដល់ប្រាក់ឧបត្ថម្ភតាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទា ដល់គ្រួសារដែលងាយរងហានិភ័យ ស្រី្តមានផ្ទៃពោះ និងកុមារដែលមានអាយុក្រោម២ឆ្នាំ រាប់ពាន់គ្រួសារថែមទៀត។
ឯកឧត្តម ស្វាយ សំអ៊ាង បានថ្លែងឱ្យដឹងទៀតថា រាជរដ្ឋាភិបាល នីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កំពុងតែដោះស្រាយអំពីបញ្ហាជីវភាពរស់នៅរបស់បងប្អូនប្រជាពលរដ្ឋ ជាពិសេសការកសាងធនធានមនុស្សឲ្យសមត្ថភាពក្នុងការចូលរួមអភិវឌ្ឍន៍ប្រទេសជាតិ៕
