ការវាយប្រហារដោយមីស៊ីលរបស់រុស្ស៊ីទៅលើអ៊ុយក្រែនបានបណ្តាលឱ្យមនុស្សយ៉ាងតិច៣០នាក់ស្លាប់ និង១៦០នាក់ទៀតរងរបួស
KYIV៖ រុស្ស៊ីបានបើកការវាយប្រហារតាមផ្លូវអាកាសដ៏ធំលើអ៊ុយក្រែនកាលពីថ្ងៃសុក្រ ទី២៩ ខែធ្នូ ដោយបានសម្លាប់មនុស្សយ៉ាងហោចណាស់ ៣០ នាក់ និងជាងមួយរយនាក់រងរបួសនៅទូទាំងប្រទេសក្នុងការវាយលុកដ៏ខ្លាំងក្លាបំផុតចាប់តាំងពីថ្ងៃដំបូងនៃសង្រ្គាមជិតពីរឆ្នាំមុនមក។
មន្ត្រីអ៊ុយក្រែនបានឲ្យដឹងថា សាលារៀន មន្ទីរពេទ្យសម្ភព កន្លែងទិញទំនិញ និងប្លុកផ្ទះល្វែងស្ថិតក្នុងចំណោមអគារដែលរងការវាយប្រហារនៅក្នុងរបាំងការពារ។
ការវាយប្រហារដែលបានឃើញកាំជ្រួចរុស្ស៊ីឆ្លងកាត់ដែនអាកាសប៉ូឡូញផងដែរនោះ បានបង្កឱ្យមានការថ្កោលទោសអន្តរជាតិ និងការសន្យាថ្មីៗនៃការគាំទ្រយោធាដល់អ៊ុយក្រែន ដែលបាននិងកំពុងប្រយុទ្ធប្រឆាំងនឹងការឈ្លានពានរបស់កងទ័ពរុស្ស៊ីតាំងពីចុងខែកុម្ភៈ ឆ្នាំ ២០២២។
លោកប្រធានាធិបតី Volodymyr Zelenskyy បានលើកឡើងថា ថ្ងៃនេះរុស្ស៊ីបានវាយប្រហារពួកយើងស្ទើរតែគ្រប់អ្វីៗទាំងអស់ដែលវាមាននៅក្នុងឃ្លាំងអាវុធរបស់ខ្លួន។
យោធាអ៊ុយក្រែនបានប៉ាន់ស្មានថា រុស្ស៊ីបានបាញ់មីស៊ីល និងយន្តហោះគ្មានមនុស្សបើកចំនួន ១៥៨ គ្រឿងលើអ៊ុយក្រែន ហើយ ១១៤ គ្រឿងត្រូវបានបំផ្លាញ។
អ្នកនាំពាក្យកងទ័ពអាកាសលោក Yuriy Ignat បានប្រាប់ AFP ថា នេះគឺជា ចំនួនកំណត់ត្រា នៃមីស៊ីល និង ការវាយប្រហារដោយមីស៊ីលដ៏ធំបំផុត នៃសង្គ្រាម ដោយមិនរាប់បញ្ចូលថ្ងៃដំបូងនៃការទម្លាក់គ្រាប់បែកឥតឈប់ឈរ។
រុស្ស៊ីបានព្យាយាមគ្របដណ្ដប់លើការការពារដែនអាកាសរបស់អ៊ុយក្រែននៅទូទាំងទីក្រុងធំៗភាគច្រើន ដោយបានបាញ់បង្ហោះយន្តហោះគ្មានមនុស្សបើកវាយប្រហារ Shahed អមដោយមីស៊ីលជាច្រើនប្រភេទដែលបាញ់ចេញពីយន្តហោះ និងពីទឹកដីដែលគ្រប់គ្រងដោយរុស្ស៊ី។
ប្រភព៖ CNA
ប្រែសម្រួលដោយ៖ ហៃ ឆៃមុីនាង
