សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ឧបត្ថម្ភស័ង្កសី ជូនគ្រួសារយោធិនជួបការលំបាក

ភ្នំពេញ៖ ដោយមើលឃើញពីរទុក្ខលំបាករបស់យោធិនក្រោមឱវាទ ឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ នាថ្ងៃទី៤ ខែមករា ឆ្នាំ២០២៤ បានចាត់តាំងកម្លាំងអន្តរាគមន៍ វរសេនាតូចថ្មើរជើងលេខ៥១៣ ដឹកនាំដោយលោកវរសេនីយ៍ត្រី គង់ សារ៉ុម មេបញ្ជាការ វរសេនាតូចថ្មើរជើងលេខ៥១៣ បាននាំយកអំណោយស័ង្កសីរបស់សម្តេចបហាបវរធិបតី ហ៊ុន ម៉ាណែត និងលោកជំទាវ ផ្តល់ជូន និងជួយធ្វើផ្ទះយោធិនជួបការលំបាក ឈ្មោះនាយចំណង់ ឡុង ចិន្តា យោធិននៅកងអនុសេនាតូចស៊ើបការណ៍ វរសេនាតូចថ្មើរជើងលេខ៥១៣ អាយុ ៥៤ឆ្នាំ រស់នៅភូមិអូរឬស្សី សង្កាត់អូរឬស្សី ក្រុងប៉ោយប៉ែត ខេត្តបន្ទាយមានជ័យ។

សូមបញ្ជាក់ថា ឧត្តមសេនីយ៍មេបញ្ជាការកងពល តែងតែយកចិត្តទុកដាក់ ដល់យោធិនជួបការលំបាកគ្រប់កាលៈទេសៈ ដែលខិតខំលះបង់កម្លាំងកាយចិត្តស្ម័គ្របម្រើអង្គភាព ដើម្បីការពារបូរណភាពទឹកដី និងនាំយកស័ង្កសី ដែលជាអំណោយ សម្តេចមហាបវរធិបតី និងលោកជំទាវ ផ្តល់ឲ្យយោធិនបានស្នាក់នៅផ្ទះសមរម្យ។

ក្នុងនោះដែរ គ្រួសារយោធិន បានគោរពជូនពរ និងថ្លែងអំណរគុណយ៉ាងជ្រាលជ្រៅបំផុតជូនចំពោះ សម្តេចមហាបវរធិបតី ហ៊ុន ម៉ាណែត និងលោកជំទាវ និងឧត្តមសេនីយ៍មេបញ្ជាការកងពល ព្រមទាំងមេបញ្ជាការ គ្រប់លំដាប់ថ្នាក់ ដែលតែងតែយកចិត្តទុកដាក់ចំពោះយោធិនជួបការលំបាកគ្រប់វេលា ព្រមទាំងបួងសួងដល់វត្ថុស័ក្តិសិទ្ធក្នុងលោក សូមប្រសិទ្ធពរជ័យបវរសួស្តីឆ្នាំថ្មី ជួបតែសេចក្ដីសុខ សេចក្តីចម្រើន សុភមង្គល ក្នុងក្រុមគ្រួសារ ទទួលបានជោគជ័យគ្រប់ភារកិច្ច និងជួបនូវពុទ្ធពរ ៤ប្រការ កុំបីឃ្លៀងឃ្លាតឡើយ ៕