លោកជំទាវ កុយ សុដានី ជួបពិភាក្សាការងារជាមួយគណៈប្រតិភូទីភ្នាក់ងារ JICA លើផែនការមេជំនួយបច្ចេកទេសក្នុងវិស័យហេដ្ឋារចនាសម្ព័ន្ធដឹកជញ្ជូននៅកម្ពុជា

ភ្នំពេញ៖ នៅព្រឹកថ្ងៃចន្ទ ទី៨ ខែមករា ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ នៃក្រសួងសាធារណការ និងដឹកជញ្ជូន បានអញ្ជើញជួបពិភាក្សាការងារ ជាមួយគណៈប្រតិភូទីភ្នាក់ងារសហប្រតិបត្តិការអន្តជាតិជប៉ុន (JICA) ដឹកនាំដោយ លោកស្រី MIYAHARA AI តំណាងជាន់ខ្ពស់ JICA ប្រចាំនៅកម្ពុជា ដោយមានការអញ្ជើញចូលរួមផងដែរពីថ្នាក់ដឹកនាំក្រសួង និងមន្ត្រីបច្ចេកទេសជំនាញពាក់ព័ន្ធផ្សេងទៀត។

ជំនួបពិភាក្សានេះ ត្រូវបានរៀបចំឡើង ដើម្បីពិនិត្យពិភាក្សាលើការបង្កើតផែនការមេហេដ្ឋារចនាសម្ព័ន្ធដឹកជញ្ជូន សម្រាប់ផ្តល់ជាជំនួយបច្ចេកទេស លើការគាំទ្រលើគម្រោងសំខាន់ៗ រួមមាន៖ គម្រោងផែនការមេស្ដីពីហេដ្ឋារចនាសម្ព័ន្ធ គម្រោងសិក្សាផែនការមេតភ្ជាប់បណ្ដាញផ្លូវរថភ្លើងក្នុងទីក្រុង គម្រោងផែនការមេដឹកជញ្ជូនសាធារណៈ និងគម្រោងលើកកម្ពស់សុវត្ថិភាពចរាចរណ៍ និងកាត់បន្ថយអត្រាគ្រោះថ្នាក់ចរាចរណ៍តាមផ្លូវថ្នល់នៅកម្ពុជា៕