ឧត្តមសេនីយ៍ឯក សុខ វាសនា ដឹកនាំកិច្ចប្រជុំពិភាក្សារស្ដីពីវឌ្ឍនភាពការងារ រយៈពេល៤ខែ និងលើកទិសដៅអនុវត្តបន្ត របស់អគ្គនាយកដ្ឋានអន្តោប្រវេសន៍
ភ្នំពេញ៖ ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ នាថ្ងៃទី៩ ខែមករា ឆ្នាំ២០២៤នេះ បានដឹកនាំកិច្ចប្រជុំពិភាក្សារស្ដីពីវឌ្ឍនភាពការងារ រយៈពេល៤ខែ ( ខែកញ្ញា ដល់ខែធ្នូ ឆ្នាំ២០២៣ ) និងលើកទិសដៅអនុវត្តបន្ត របស់អគ្គនាយកដ្ឋានអន្តោប្រវេសន៍ ។
កិច្ចប្រជុំនេះមានការអញ្ជើញចូលរួមពី ឯកឧត្តម-លោកជំទាវ អគ្គនាយករង លោក-លោកស្រីប្រធាននាយកដ្ឋាន លោកអនុប្រធាននាយកដ្ឋាន លោកនាយ និងមន្រ្តីជំនាញពាក់ព័ន្ធមួយចំនួនទៀត។
ជាកិច្ចចាប់ផ្ដើម ឯកឧត្តម ឧត្តមសេនីយ៍ឯក សុខ វាសនា បានមានប្រសាសន៍ស្វាគមន៍ និងចាប់ផ្ដើមបើកកម្មវិធី ព្រមទាំងអនុញ្ញាតឱ្យលោក លោកស្រីប្រធានយកដ្ឋាន ធ្វើសេចក្ដីរាយការណ៍លំអិតអំពីរបាយការណ៍កិច្ចការងារអំឡុងរយៈពេល៤ខែ កន្លងមករបស់អគ្គនាយកដ្ឋានអន្តោប្រវេសន៍។
បន្ទាប់ពីបានស្ដាប់នូវរបាយការណ៍រួចមកឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានណែនាំនូវអនុសាសន៍មួយចំនួន និងបានឲ្យអង្គពិធីលើកជាមិតិយោបល់។ ឯកឧត្តម អគ្គនាយក បានមានប្រសាសន៍ឲ្យ ចូលរួមមតិវាយតម្លៃលើបញ្ហាសំខាន់ៗដែលកើតមានឡើងកន្លងមកដែលគួរឲ្យកត់សម្គាល់ និងត្រូវយកចិត្តទុកដាក់ដោះស្រាយបន្តទៅមុខទៀតនៅក្នុង ឆ្នាំ២០២៤ និងបញ្ហាសំណូមចំនួនទៀតដែលចាំបាច់។
ក្នុងកិច្ចប្រជុំនេះដែរ ឯកឧត្តម អគ្គនាយករង និងប្រធាននាយកដ្ឋានមួយចំនួនបានមានមតិយោបល់លើកឡើងនូវបញ្ហារប្រឈម ផលលំបាក និងសំណូមពរមួយចំនួនលើកិច្ចការជំនាញ ការប្រតិបត្តិការនាពេលកន្លងមកជូនឯកឧត្តមអគ្គនាយកជ្រាប។
ជាមួយគ្នានេះដែរ ឯកឧត្តម ឧត្តមសេនីយ៍ឯក សុខ វាសនា បានមានប្រសាសន៍ថ្លែងអំណរគុណដល់ក្រុមការងារគ្រប់នាយកដ្ឋានដែលបានរៀបចំរបាយការណ៍ ប្រឹងប្រែងអនុវត្តតាមគោលការណ៍ដែលបានដាក់ជូន ឯកឧត្តម អគ្គនាយក ក៏បានឯកភាពរាល់មតិយោបល់ដែលបានលើកឡើង។
ឯកឧត្តម ឧត្តមសេនីយ៍ឯក បានបញ្ជាក់ផងដែលថាតាមប្រសាសន៍ដ៏ខ្ពង់ខ្ពស់ សម្ដេចមហាបវរធីបតី និងឯកឧត្តមអភិសន្តិបណ្ឌិត ក្នុងគោលនរយោបាយ “ សម្អាតផ្ទះរបស់យើង “ ឯកឧត្តម ថ្នាក់ដឹកនាំ ព្រមទាំងមន្រ្តីនៃអគ្គនាយកដ្ឋានអន្តោប្រវេសន៍ទាំងអស់ត្រូវគោរពឱ្យបានម៉ឺងម៉ាត់ទាក់ទងវិន័យកងកម្លាំង វត្តមាន ជាពិសេសអនុវត្តវិធានការតេស្តរកសាធាតុញៀននាពេលខាងមុខឆាប់ៗនេះ។ ឯកឧត្តម ឧត្តមសេនីយ៍ឯក ក៏បានឲ្យនាយកដ្ឋានទាំងអស់រួមសហការបន្តទៀត រាល់ប្រតិបត្តិការការងារ និងប្រកបដោយវិជ្ជាជីវនគរបាលអន្តោប្រវេសន៍ ៕
