ចិនថាការបង្រួបបង្រួមជាមួយតៃវ៉ាន់នៅតែជៀសមិនរួចទេ បន្ទាប់ពីការបោះឆ្នោត

ប៉េកាំង៖ ប្រទេសចិនបានបញ្ជាក់ថា ការបង្រួបបង្រួមជាមួយតៃវ៉ាន់នៅតែជៀសមិនរួច បន្ទាប់ពីប្រធានាធិបតីជាប់ឆ្នោតលោក William Lai Ching-te បានឈ្នះការបោះឆ្នោតដ៏សំខាន់កាលពីថ្ងៃសៅរ៍ ទី១៣ ខែមករា នៅលើកោះគ្រប់គ្រងដោយខ្លួនឯង ដែលទីក្រុងប៉េកាំងអះអាងថាជារបស់ខ្លួន។

លោក Lai ដែលចិនចាត់ទុកថាជាការគំរាមកំហែងដល់សន្តិភាពបានឈ្នះអាណត្តិទីបីជាប់គ្នាមិនធ្លាប់មានសម្រាប់គណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាចរបស់តៃវ៉ាន់បន្ទាប់ពីលោកបានតាំងខ្លួនជាអ្នកការពាររបៀបរស់នៅបែបប្រជាធិបតេយ្យរបស់កោះនេះ។

នៅក្នុងសេចក្តីថ្លែងការណ៍មួយដែលបានចេញផ្សាយបន្ទាប់ពីលោក Lai ក្លាយជាអ្នកឈ្នះ អ្នកនាំពាក្យការិយាល័យកិច្ចការតៃវ៉ាន់របស់ទីក្រុងប៉េកាំង លោក Chen Binhua បានឲ្យដឹងនៅក្នុងសេចក្តីថ្លែងការណ៍មួយថា ការបោះឆ្នោតនឹងមិនរារាំងនិន្នាការជៀសមិនរួចនៃការបង្រួបបង្រួមរបស់ប្រទេសចិន នេះបើយោងតាមទីភ្នាក់ងារសារព័ត៌មានរដ្ឋ Xinhua។

លោក Chen បានបញ្ជាក់ថាលទ្ធផលនៃការបោះឆ្នោតបានបង្ហាញថា DPP មិនអាចតំណាងឱ្យមតិសាធារណៈទូទៅនៅលើកោះនេះ។

លោក Chen ក៏បានបន្ថែមផងដែរថា ការបោះឆ្នោត នឹងមិនផ្លាស់ប្តូរទិដ្ឋភាពជាមូលដ្ឋាន និងនិន្នាការអភិវឌ្ឍន៍នៃទំនាក់ទំនងឆ្លងច្រកសមុទ្រទេ។

លោកបានមានប្រសាសន៍ថា ជំហររបស់ទីក្រុងប៉េកាំងស្តីពីការបង្រួបបង្រួមជាតិពិតប្រាកដ នៅតែជាប់លាប់ ហើយការប្តេជ្ញាចិត្តរបស់យើងគឺរឹងមាំដូចថ្ម។

លោកបានបន្តថា រដ្ឋាភិបាលក្រុងប៉េកាំង ប្រឆាំងយ៉ាងម៉ឺងម៉ាត់ចំពោះសកម្មភាពបំបែកខ្លួនដែលមានគោលបំណងដើម្បី ឯករាជ្យភាពតៃវ៉ាន់ ព្រមទាំងការជ្រៀតជ្រែកពីបរទេស។

ការបោះឆ្នោតនេះត្រូវបានឃ្លាំមើលយ៉ាងដិតដល់ដោយទីក្រុងប៉េកាំង និងទីក្រុងវ៉ាស៊ីនតោន ដែលជាដៃគូយោធាដ៏សំខាន់របស់តៃវ៉ាន់ ខណៈដែលមហាអំណាចទាំងពីរប្រជែងគ្នាដណ្តើមឥទ្ធិពលនៅក្នុងតំបន់ដ៏មានសារៈសំខាន់ជាយុទ្ធសាស្ត្រ។

នៅក្នុងសុន្ទរកថាឆ្នាំថ្មី ប្រធានាធិបតីចិនលោក Xi Jinping បានឲ្យដឹងថា ការបង្រួបបង្រួមនៃកោះតៃវ៉ាន់ជាមួយប្រទេសចិនគឺជៀសមិនរួចទេ។

នៅក្នុងដំណើរការបោះឆ្នោត ទីក្រុងប៉េកាំងបានព្រមានថាលោក Lai គឺជា គ្រោះថ្នាក់ធ្ងន់ធ្ងរដែលនឹងគំរាមកំហែងដល់សន្តិភាព ដោយដើរតាមផ្លូវអាក្រក់ នៃឯករាជ្យភាព។

ប្រភព៖ CNA

ប្រែសម្រួលដោយ៖ ឡាយ លីហួ