សម្តេចធិបតី ចំអកឱ្យលោក សម រង្ស៉ី ថា លែងហ៊ានរិះគន់សម្តេចជាក្មេងអត់ទាន់ជ្រុះពន្លៃពីក្បាលទៀត

ភ្នំពេញ៖ នាយករដ្ឋមន្ត្រីនៃកម្ពុជា សម្តេចធិបតី ហ៊ុន ម៉ាណែត បានចំអកឱ្យអ្នកនយោបាយចាស់វស្សាលោក សម រង្ស៉ី ថាលែងហ៊ានរិះគន់សម្តេចជាក្មេងមិនទាន់ជ្រុះពន្លៃពីក្បាលទៀតហើយ ព្រោះខ្លាចចប់ ដោយសារតែដៃគូសន្ទនារបស់សម្តេច គឺប្រធានាធិបតីបារាំង អេម៉ានុយអែល ម៉ាក្រុង មានអាយុប្អូនសម្តេចធិបតី ២ខែ។

ទោះបីសម្តេចធិបតីមិនបញ្ជាក់ឈ្មោះចំៗក្តី ប៉ុន្តែត្រូវបានគេដឹងថា អ្នកនយោបាយចាស់វស្សានៅបារាំងនោះ ជាទណ្ឌិត សម រង្ស៉ី ដែលថ្មីៗមកនេះទើបតែចេញសារឱ្យប្រធានាធិបតីបារាំង ប្រយ័ត្នចាញ់បោកសម្តេចធិបតី។

សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះ ធ្វើឡើងក្នុងអញ្ជើញសំណេះសំណាលជាមួយបងប្អូនសហគមន៍ខ្មែររស់ នៅក្នុងទ្វីបអឺរ៉ុប នៅវេលាម៉ោង៥ល្ងាច ត្រូវនឹងម៉ោង១១យប់ថ្ងៃទី១៤ ខែមករា ឆ្នាំ២០២៤ ម៉ោងនៅកម្ពុជា។

ជាមួយគ្នានេះ សម្តេចធិបតីបានចាត់ទុកការចេញសារ របស់អ្នកនយោយចាស់វស្សារូបនេះ ដែលឱ្យប្រធានាធិបតីបារាំង ប្រយ័ត្នចាញ់បោកសម្តេច គឺនយោបាយបម្រើមហិច្ឆិតារបស់ខ្លួន មិនគិតពីប្រយោជន៍ជាតិនោះឡើយ៕