អ្នកនាំពាក្យរាជរដ្ឋាភិបាលកម្ពុជា៖ រាល់របាយការណ៍របស់ អង្គការ Human Rights Watch គឺមិនដែលឃើញកម្ពុជាល្អឡើយ

ភ្នំពេញ៖ ឯកឧត្ដម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានបញ្ជាក់ថា ដូចរាល់លើករបាយការណ៍របស់ អង្គការសិទ្ធិមនុស្ស គឺមិនដែលឃើញកម្ពុជាល្អឡើយ ពោលរាល់របាយការណ៍របស់គេ ដើម្បីបំផ្លាញកិត្តិយសរបស់កម្ពុជាគ្រប់ពេល ។

សូមរំលឹកថា កាលពីថ្ងៃ១២ ខែមករា ឆ្នាំ២ឥ២៤ អង្គការ​សិទ្ធិ​មនុស្ស (Human Rights Watch) មានមូលដ្ឋាននៅសហរដ្ឋអាមេរិក បានចេញផ្សាយរបាយការណ៍មួយ ដោយបានរក​ឃើញថា​ រាជរដ្ឋាភិបាលកម្ពុជាថ្មីនាអាណត្តិទី៧នេះ “មិន​បាន​ធ្វើ​ឲ្យស្ថានភាព​សិទ្ធិ​មនុស្ស​មាន​ភាព​ល្អ​ប្រសើរ​” ។ ជាមួយគ្នានេះអង្គការនេះ ក៏លើកពីការ​បង្ក្រាប​របស់រាជ​រដ្ឋាភិបាល​ទៅ​លើ​គណ​បក្ស​ប្រឆាំង ប្រព័ន្ធ​ផ្សព្វ​ផ្សាយ​ឯករាជ្យ សកម្មជន​ដី​ធ្លី មេ​ដឹក​នាំ​សង្គម​ស៊ីវិល ​មេ​ដឹក​នាំ​សហជីព។

អ្នកនាំពាក្យរូបនេះ លើកឡើងថា របាយការណ៍ HRW អត់មានអ្វីចម្លែកនោះទេ ព្រោះជារបាយការណ៍មានលក្ខណៈវាយប្រហារមកលើរាជរដ្ឋាភិបាលទាំងអាណត្តិចាស់ និងអាណត្តិថ្មី ទោះបីជាឃើញជាក់ស្តែងកម្ពុជាល្អប្រសើរ ក៏ពួកគេមើលមិនឃើញដែរ ។

ឯកឧត្ដមបន្ថែមថា អង្គការតាំងខ្លួនជាអង្គការពារសិទ្ធិមនុស្សនេះដែលបានលើកថា សម្តេចធិបតី ហ៊ុន ម៉ាណែត មិនបានធ្វើឲ្យសិទ្ធិមនុស្សល្អប្រសើរ តែការពិតអង្គការនេះមិនចេះវាយតម្លៃអំពីសិទ្ធិមនុស្សកម្ពុជាទៅវិញ ជាក់ស្តែងគឺរាជរដ្ឋាភិបាលកម្ពុជានេះហើយជាអ្នកផ្តល់សិទ្ធិរួសរានមានជីវិតទៅដល់ប្រជាពលរដ្ឋខ្មែរ ផ្តល់សិទ្ធិគ្រប់បែបយ៉ាងទាំងអស់។

ឯកឧត្ដម ប៉ែន បូណា ថ្លែងថា ក្នុងរយៈពេលជាង៤ខែដែលសម្តេចធិបតី ហ៊ុន ម៉ាណែតឡើងកាន់អំណាចដែលHRW មិនបើកភ្នែកមើលនោះ គឺគោលនយោបាយទាំង៦ចំណុចដាក់ចេញ ក្នុងអាណត្តិថ្មីនេះ សុទ្ធសឹងតែជាការលើកកម្ពស់សិទ្ធិមនុស្ស ដូចជា ការផ្តល់សេវាផ្នែកសុខាភិបាល, ការបណ្តុះបណ្តាលជំនាញវិជ្ជាជីវៈបច្ចេកទេសដល់កូនអ្នកក្រីក្រ , ការជួយទៅដល់អ្នកប្រកបមុខរបរតូចតាច (សេដ្ឋកិច្ចក្រៅប្រព័ន្ធ) និងការជួយប្រជាកសិករជាដើម ៕