ក្រសួងសេដ្ឋកិច្ច ចេញសេចក្ដីប្រកាសព័ត៌មានស្ដីពីផែនការបោះផ្សាយលក់មូលបត្ររដ្ឋ ឆ្នាំ២០២៤
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានចេញសេចក្ដីប្រកាសព័ត៌មានជូនដំណឹងដល់វិនិយោគិនសក្ដានុពលទាំងអស់ ដែលជាគ្រឹះស្ថានធនាគារ និងហិរញ្ញវត្ថុ និងគ្រឹះស្ថានមិនមែនធនាគារ និងហិរញ្ញវត្ថុថា សម្រាប់ឆ្នាំ២០២៤ រាជរដ្ឋាភិបាល នឹងធ្វើការបោះផ្សាយលក់មូលបត្ររដ្ឋ តាមរយៈការដេញថ្លៃលើផ្លែតហ្វម របស់ធនាគារជាតិនៃកម្ពុជា ក្នុងទំហំទឹកប្រាក់ ៤៤០ពាន់លានរៀល (ប្រហែល១០៧លានដុល្លារ)។
ក្រសួងសេដ្ឋកិច្ច និងហិរញ្ញវត្ថុ នឹងផ្សព្វផ្សាយអំពីយន្តការ និងនីតិវិធីនៃការចូលរួមរបស់គ្រឹះស្ថានមិនមែនធនាគារ និងហិរញ្ញវត្ថុ ក្នុងការវិនិយោគលើមូលបត្ររដ្ឋនាពេលក្រោយ។
ជាមួយគ្នានេះ សេចក្តីជូនដំណឹងលម្អិតស្តីពី ការបោះផ្សាយលក់មូលបត្ររដ្ឋមួយលើកៗ និងលទ្ធផលស្តីពីការដេញថ្លៃមូលបត្ររដ្ឋ នឹងមានផ្សព្វផ្សាយលើបណ្ដាញសារព័ត៌មានផ្លូវការ របស់ធនាគារជាតិនៃកម្ពុជា៕
