អភិបាលខេត្តកំពង់ចាម ណែនាំរដ្ឋបាលក្រុង ស្រុក ពិនិត្យមើលឡើងវិញ អាជីវកម្មឆ្នោតផ្សងសំណាងផ្សេងៗ

ភ្នំពេញ៖ ឯកឧត្ដម អ៊ុន ចាន់ដា អភិបាលខេត្តកំពង់ចាម បានណែនាំដល់គណៈបញ្ជាការឯកភាពរដ្ឋបាលក្រុង ស្រុកទាំង ១០ ពិនិត្យមើលឡើងវិញ នូវអាជីវកម្មឆ្នោតផ្សងសំណាងផ្សេងៗក្នុងមូលដ្ឋានរបស់ខ្លួន ដើម្បីបញ្ជៀសការធ្វើឱ្យប៉ះពាល់ដល់ជីវភាពប្រជាពលរដ្ឋ ។

ការណែនាំបែបនេះបានធ្វើឡើងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកំពង់ចាម នារសៀលថ្ងៃទី ២២ ខែមករា ឆ្នាំ២០២៤ ។

ឯកឧត្ដមអភិបាលខេត្ត បានឲ្យដឹងថា បច្ចុប្បន្នមានព័ត៌មាន ទាក់ទងទៅនឹងបញ្ហា ការធ្វើអាជីវកម្មឆ្នោតផ្សងសំណាងផ្សេងៗ ដែលបង្កលក្ខណៈធ្វើឲ្យប្រជាពលរដ្ឋ នាំគ្នាលេងល្បែងមួយនេះរហូតដល់ភ្លេចភ្លាំង លែងចង់ធ្វើការងារ។

ដោយក្តីបារម្ភ ខ្លាចបង្កឲ្យមានផលប៉ះពាល់ធ្ងន់ធ្ងរ ដល់ជីវភាពប្រជាពលរឯកឧត្ដមអភិបាលខេត្ត បានណែនាំដល់អភិបាល នៃគណៈអភិបាល ក្រុង ស្រុកទាំង ១០ ពិនិត្យមើលឡើងវិញ ពីព្រោះថា បើទោះល្បែងនោះ មានច្បាប់អនុញ្ញាតត្រឹមត្រូវយ៉ាងណាក៏ដោយ ប៉ុន្តែបើអាជ្ញាធរពិនិត្យឃើញថា មានផលប៉ះពាល់ដល់ប្រជាពលរដ្ឋធ្ងន់ធ្ងរ គឺយើងចាំបាច់ត្រវលើកជាយោបល់ជម្រាបជូន ទៅថ្នាក់ជាតិ ដើម្បីមានវិធានការដោះស្រាយ៕