អភិបាលខេត្តស្ទឹងត្រែង អំពាវនាវនិងជំរុញដល់មន្ត្រីគ្រប់លំដាប់ថ្នាក់ខិតខំយកចិត្តទុកដាក់សហការគ្នាដើម្បីឲ្យការចុះបញ្ជីដីធ្លីជាលក្ខណៈប្រព័ន្ធ បញ្ចប់តាមផែនការ

ភ្នំពេញ៖ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្តស្ទឹងត្រែង បានអំពាវនាវ និងជំរុញដល់មន្ត្រីគ្រប់លំដាប់ថ្នាក់ឲ្យខិតខំយកចិត្តទុកដាក់ រួមទាំងសហការជាមួយអាជ្ញាធរពាក់ព័ន្ធដើម្បីឲ្យការចុះបញ្ជីដីធ្លីជាលក្ខណៈប្រព័ន្ធបានបញ្ចប់តាមផែនការដែលបានគ្រោងទុករបស់ក្រសួងរៀបចំដែនដី នគរូបនីយកម្ម និងសំណង់ ដែលបានប្តេជ្ញាចិត្ត ក្នុងការចុះបញ្ជីដីធ្លីនេះឲ្យក្នុងឆ្នាំ២០២៥។

ឯកឧត្ដមបានអំពាវនាវបែបនេះ ក្នុងឳកាសអញ្ជើញជាអធិបតីក្នុងពិធីបិទផ្សាយជាសាធារណៈ នូវឯកសារនៃការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិថ្មី សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង នាថ្ងៃទី៣០ ខែមករា ឆ្នាំ២០២៤នេះ។

ឯកឧត្តម ស្វាយ សំអ៊ាង អភិបាលខេត្តស្ទឹងត្រែង មានប្រសាសន៍ថា រាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្រចតុកោណដំណាក់កាលទី១ ដើម្បីកំណើនសមធម៌ និងបច្ចេកវិទ្យា នេះជាការគិតគូរអំពីយុទ្ធសាស្ត្រក៏ដូចជា ផែនការនៃការក្នុងការប្រើប្រាស់ដីធ្លី និងដាក់ចេញនូវគោលនយោបាយកំណែទម្រង់លើវិស័យដីធ្លី ដើម្បីធ្វើយ៉ាងណាឲ្យការគ្រប់គ្រង ការចាត់ចែង ការប្រើប្រាស់ដីធ្លីស្របទៅតាមច្បាប់ និងប្រកបដោយចីរភាពទាំងដីរបស់រដ្ឋ និងកម្មសិទ្ធិឯកជន។

ឯកឧត្តមអភិបាលខេត្ត បន្តថា ការចុះបញ្ជីដីធ្លីនេះ ជាការធានានូវផ្លូវច្បាប់ ដូច្នេះហើយយន្តការរបស់យើងបានជំរុញការចុះបញ្ជីដីធ្លីតាំងពីមុនរហូតមក តាមរយៈការដាក់ចេញតាមសកម្មភាពគោលនយោបាយចាស់ និងសកម្មភាពថ្មីទៅលើវិស័យដីធ្លីនេះ តាមរយៈការចុះវាស់វែងដោយក្រុមនិស្សិតចាប់តាំងពីឆ្នាំ២០១២-២០១៣ នូវក្នុងក្របខណ្ឌទូទាំងប្រទេស និងបានចេញប័ណ្ណកម្មសិទ្ធិជូនប្រជាពលរដ្ឋប្រមាណជាង ២លានក្បាលដីដែលជាកម្មសិទ្ធិរបស់ប្រជាពលរដ្ឋ។

ឯកឧត្តមអភិបាលខេត្ត បន្ថែមទៀតថា ក្រៅពីយុទ្ធនាការចុះបញ្ជីដីធ្លីនេះ រាជរដ្ឋាភិបាល ជាពិសេសក្រសួងរៀបចំដែនដី នគរូបនីយកម្ម និងសំណង់ ក៏បានជំរុញការចុះបញ្ជីជាលក្ខណៈប្រព័ន្ធថែមទៀតហើយសម្រាប់ខេត្តស្ទឹងត្រែងនេះ បើតាមផែនការមានរហូតទៅដល់ជាង៥ម៉ឺនក្បាលដីទៀត ដែលកំពុងប្រមូលទិន្នន័យការចុះបញ្ជីដីធ្លីជាលក្ខណៈប្រព័ន្ធ៕