សម្តេចធិបតី៖ កម្ពុជា រក្សាបានភាពធនរឹងមាំក្នុងផ្នែកស្បៀងអាហារ ស្របពេលស្ថានភាពពិភពលោកជួបវិបត្តិស្បៀងអាហារ
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ជាការពិតវិស័យកសិកម្មនៅកម្ពុជា នៅតែបន្តរឹងមាំ និងរក្សាបាននូវភាពរឹងមាំបានរួមចំណែកដ៏សំខាន់ នៅក្នុងការបន្ធូរបន្ថយភាពតានតឹងនៅក្នុងផ្នែកសេដ្ឋកិច្ច ជាពិសេសធានាបាននូវសន្តិសុខស្បៀង បញ្ចៀសបាននូវវិបត្តិស្បៀងអាហារ និងកាត់បន្ថយអតិផរណានៃតម្លៃស្បៀងក្នុងប្រទេស។
ក្នុងឱកាសអញ្ជើញបិទសន្និបាតបូកសរុបការងារឆ្នាំចាស់ និងលើកទិសដៅការងារឆ្នាំថ្មីរបស់ក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី៣០ ខែមករា ឆ្នាំ២០២៤ សម្តេចធិបតី បានបញ្ជាក់ថា ទោះបីក្នុងស្ថានភាពពិភពលោកជួបប្រទះនូវវិបត្តិជាបន្តបន្ទាប់ ដូចជាការឆ្លងរីករាលដាលជំងឺកូវីដ១៩ និងបញ្ហាស្មុគស្មាញផ្នែកភូមិសាស្ត្រនយោបាយ ដែលបានជះឥទ្ធិពលយ៉ាងខ្លាំងដល់ស្ថានភាពសង្គមសេដ្ឋកិច្ចកម្ពុជាយ៉ាងណាក្តី។
នៅក្នុងស្មារតីបុរេសកម្មរាជរដ្ឋាភិបាលបានដាក់ចេញនូវគោលនយោបាយមួយចំនួន សំដៅជំរុញសេដ្ឋកិច្ចឱ្យងើបឡើងវិញបានឆាប់រហ័ស ជាមួយនឹងកំណើន ៥,៦ ភាគរយនៅឆ្នាំ២០២៣ និងការរំពឹងទុកថា អាចសម្រេចបានកំណើនប្រមាណ ៦,៦ នៅឆ្នាំ២០២៤នេះ៕
