រដ្ឋបាលខេត្តស្ទឹងត្រែង ប្រកាសច្រានចោលចំពោះការផ្សាយព័ត៌មានមិនពិតរបស់ The Cambodia Daily ដែលមានចំណងជើងថា “ឧកញ៉ា ជ័យ កំពុងម៉ៅការកាប់ឈើខុសច្បាប់ឱ្យក្រុមហ៊ុនកូរ៉េ T.S.M.W លើផ្ទៃដី ជិត ១ម៉ឺនហិកតាក្នុងខេត្តស្ទឹងត្រែង”
ភ្នំពេញ៖ រដ្ឋបាលខេត្តស្ទឹងត្រែង បានចេញសេចក្ដីប្រកាសព័ត៌មានបញ្ជាក់ជូនសាធារណជនទាំងក្នុង និងក្រៅស្រុក ព្រមទាំងអ្នកសារព័ត៌មានជាតិ-អន្តរជាតិ មេត្តាជ្រាបថា ក្រោយពីបានពិនិត្យឃើញថា មានករណ៏ ការចុះផ្សាយនៅលើគេហទំព័រ The Cambodia Daily នាថ្ងៃទី៣០ ខែមករា ឆ្នាំ២០២៤ មាន ចំណងជើងថា “ឧកញ៉ា ជ័យ កំពុងម៉ៅការកាប់ឈើខុសច្បាប់ឱ្យក្រុមហ៊ុនកូរ៉េ T.S.M.W លើផ្ទៃដី ជិត ១ម៉ឺនហិកតាក្នុងខេត្តស្ទឹងត្រែង” ហើយខ្លឹមសារនេះក៏បានផ្សារភ្ជាប់ទៅជាមួយនឹងការចុះផ្សាយ កាលពីថ្ងៃទី៨ ខែមីនា ឆ្នាំ២០២៣ កន្លងទៅដោយសារព័ត៌មានអន្តរជាតិ Mongabay ផងដែរ។ ការចុះផ្សាយនេះ មានចរិតធ្វើឱ្យសាធារណជនមានការយល់ច្រឡំមកលើថ្នាក់ដឹកនាំ ដែលការពិតនោះ ពុំមែនមានករណីដូច្នោះឡើយ។
រដ្ឋបាលខេត្តស្ទឹងត្រែង សូមធ្វើការបំភ្លឺជូនសាធារណជនមេត្តាជ្រាបថា ខ្លឹមសារដែលបាន ផ្សព្វផ្សាយនៅលើគេហទំព័រខាងលើនោះ បានសរសេររៀបរាប់អំពីភូមិសាស្ត្រក្រុមហ៊ុន ធី អេស អឹម ដាប់ប៊ែលយូ ឯ.ក (T.S.M.W Co., Ltd.) គឺជាក្រុមហ៊ុនដែលបានទទួលសិទ្ធិតាមរយៈលិខិតលេខ ១៨១ សជណ ចុះថ្ងៃទី១១ ខែមីនា ឆ្នាំ២០២២ របស់ទីស្ដីការគណៈរដ្ឋមន្ត្រី ស្តីពីការផ្ដល់សំណង នូវផ្ទៃដីទំហំ ៩.៧៨៨ហិកតា និង៨៨៨សង់ទីអា ដែលជាសម្បទានដីសេដ្ឋកិច្ច ជូនដល់ក្រុមហ៊ុន សម្រាប់ធ្វើការវិនិយោគ ដែលមានឈ្មោះលោក សូ សារ៉ាន ជាអភិបាលក្រុមហ៊ុន និងជាអ្នកទទួល ខុសត្រូវ។ ជាក់ស្តែងមិនមានឈ្មោះ ឧកញ៉ា មិក សាផាណារេត ឬហៅថាឧកញ៉ាជ័យនោះឡើយ។
រដ្ឋបាលខេត្តស្ទឹងត្រែង សូមធ្វើការបំភ្លឺ និងបដិសេធន៍ទាំងស្រុងថា ការផ្សព្វផ្សាយអត្ថបទ ព័ត៌មានខាងលើនេះ គឺជាការមួលបង្កាច់ ប្រឌិតរឿង និងបំផ្លើសបំភ្លៃការពិត មានចរិតប្រែក្លាយឱ្យ ទៅជាបញ្ហានយោបាយ ដើម្បីតែផលប្រយោជន៍របស់ក្រុមខ្លួនប៉ុណ្ណោះ។
រដ្ឋបាលខេត្តស្ទឹងត្រែង សូមធ្វើការប្រកាសច្រានចោលទាំងស្រុងនូវព័ត៌មានដែលមានចរិត ពិសពុល ប្រកបដោយឧបាយកលទុច្ចរិតដូចបានចុះផ្សាយនោះ និងសូមថ្កោលទោសដល់ចំពោះ ក្រុមមួយចំនួនដែលបានប្រព្រឹត្ត និងនៅពីក្រោយករណីនេះ ព្រមទាំងសូមអំពាវនាវដល់គ្រប់ស្ថាប័ន មានសមត្ថកិច្ច មេត្តាចាត់វិធានការតាមផ្លូវច្បាប់ចំពោះជនទាំងនោះឱ្យបានម៉ឺងម៉ាត់បំផុត។
ជាមួយគ្នានេះរដ្ឋបាលខេត្តសូមថ្លែងអំណរគុណ និងរង់ចាំទទួលរាល់ព័ត៌មាន មតិស្ថាបនាពីសាធារណជន ក្នុងគោលបំណងលើកកម្ពស់ការអភិវឌ្ឍសេដ្ឋកិច្ចសង្គមឱ្យមានការរីកចម្រើនឡើងជាបន្តបន្ទាប់៕
