មន្ត្រីជាន់ខ្ពស់ក្រសួងធនធានទឹក ដឹកនាំក្រុមការងារ ចុះអន្តរាគមន៍បូមទឹកស្រោចស្រពស្រូវរដូវប្រាំង ជូនប្រជាកសិករ ក្នុងខេត្តព្រៃវែង
ភ្នំពេញ៖ នាថ្ងៃសុក្រ ៨រោច ខែបុស្ស ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២ ខែកុម្ភៈ ឆ្នាំ២០២៤ ឯកឧត្តម តន់ វ៉ាន់ថារ៉ា រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារសម្របសម្រួលធនធានទឹកខេត្តព្រៃវែង និងខេត្តស្វាយរៀង បានដឹកនាំក្រុមការងារចុះអន្តរាគមន៍បូមទឹកសង្រ្គោះស្រូវរដូវប្រាំងជូនបងប្អូនប្រជាកសិករ ដែលកំពុងប្រឈមខ្វះទឹក ក្នុងខេត្តព្រៃវែង។
ក្នុងឱកាសនោះ ឯកឧត្តមរដ្ឋលេខាធិការ រួមជាមួយឯកឧត្តម ជួន ប៊ិតថុល អនុរដ្ឋលេខាធិការ ឯកឧត្តម សា ស៊ីថា អភិបាលរងនៃគណៈអភិបាលខេត្តកំពង់ចាម លោកប្រធានមន្ទីរធនធានទឹក និងឧតុនិយមខេត្តកំពង់ចាម និងខេត្តព្រៃវែង មន្រ្តីជំនាញនិងតំណាងក្រុមហ៊ុនចិន បានអញ្ជើញចុះពិនិត្យជាក់ស្តែងសកម្មភាពរៀបចំដាក់ «អ៊ូ» បូមយកល្បាប់ភក់ចេញនៅមុខស្ថានីយទី១ នៃគម្រោងអភិវឌ្ឍន៍ប្រព័ន្ធស្រោចស្រពវ៉ៃគោជំហាន២ ស្ថិតក្នុងឃុំមហាលាភ ស្រុកកោះសូទិន ខេត្តកំពង់ចាម ដើម្បីឱ្យម៉ូទ័រដំណើរការបូមយកទឹកពីទន្លេតូច បញ្ជូនទៅសង្រ្គោះស្រូវប្រាំងដែលកំពុងប្រឈមខ្វះទឹកចំនួន ៩៨៨ហិកតា ក្នុង ១៣ឃុំ នៃស្រុកចំនួន០៣ ក្នុងខេត្តព្រៃវែង។
ជាមួយគ្នានេះដែរ ឯកឧត្តមរដ្ឋលេខាធិការ បានណែនាំឱ្យប្រធានមន្ទីរធនធានទឹក និងឧតុនិយមខេត្តកំពង់ចាម និងខេត្តស្វាយរៀង ព្រមទាំងសហការីឱ្យបន្តសហការគ្នា ពិនិត្យស្ថានភាពទឹក ស្ថានភាពនៃការងារបង្កបង្កើនផល និងបន្តចុះអន្តរាគមន៍បូមទឹកជួយសង្គ្រោះស្រូវប្រាំងរបស់ប្រជាកសិករឱ្យបានទាន់ពេលផងដែរ ៕
