ឯកឧត្ដម សាយ សំអាល់ ចង់ឃើញពលរដ្ឋខ្មែរគ្រប់រូប មានទ្រនំសុភមង្គល សុខភាពល្អ មានលទ្ធភាពបញ្ជូនកូនទៅរៀន ដែលរួមចំណែកកសាងមូលធនមនុស្សឱ្យកាន់តែរឹងមាំ
ភ្នំពេញ៖ ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងថា ឯកឧត្ដមចង់ឃើញប្រជាជនខ្មែរគ្រប់ៗរូបមានទ្រនំសុភមង្គល មានម្ហូបលើតុ មានសុខភាពល្អ ហើយមានលទ្ធភាពបញ្ជូនកូនទៅសាលារៀន ដែលរួមចំណែកក្នុងការកសាងមូលធនមនុស្សនៅកម្ពុជាឱ្យកាន់តែរឹងមាំ ដែលនេះជាបុរេលក្ខខណ្ឌក្នុងការធានានិរន្តរភាពនៃសន្តិភាព និងភាពសម្បូរសប្បាយរុងរឿងនៃជាតិ និងប្រជាជនកម្ពុជា។
ការថ្លែងបែបនេះ របស់ឧបនាយករដ្ឋមន្ត្រី សាយ សំអាល់ បានធ្វើឡើងក្នុងឱកាសអញ្ជើញជាអធិបតីភាពប្រគល់ពាន និងបំពាក់មេដាយ ក្នុង «កម្មវិធីពានរង្វាន់ស្ថាបត្យករវ័យក្មេងកម្ពុជា ឆ្នាំ២០២៣» ក្រោមប្រធានបទ «ទីក្រុងនៃក្តីស្រមៃនាពេលអនាគត» ដែលរៀបចំដោយសមាគម អ្នកវិនិយោគ អ្នកសាងសង់ និងស្ថាបត្យករ កម្ពុជា (ស.វ.ស.ស.ក)។ កម្មវិធីនេះទទួលបានការគាំទ្រពីគណៈស្ថាបត្យករកម្ពុជា នាថ្ងៃទី២ ខែកុម្ភៈ ឆ្នាំ២០២៤ នាសាលសន្និសីទ ក្រសួងរៀបចំដែនដី នគរូបនីយកម្ម និងសំណង់។
ពិធីនេះមានការអញ្ជើញចូលរួមជាកិត្តិយស ពីថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ គណៈអភិបាលក្រុងអរិយក្សត្រ គណៈស្ថាបត្យករកម្ពុជា គណៈវិស្វករកម្ពុជា សមាគម សាកលវិទ្យាល័យ ក្រុមហ៊ុនឯកជន សមាជិកសមាជិកា សមាគម ស.វ.ស.ស.ក រួមជាមួយសាស្ត្រចារ្យ និងសិស្សនិស្សិត សរុបចំនួន ៤០០នាក់។
លោក សេង ប៊ុនវីរៈ ប្រធានសមាគម ស.វ.ស.ស.ក បានឡើងអានរបាយការណ៍ពីកម្មវិធីប្រកួត និងវឌ្ឍនភាពសមាគម ជូនឧបនាយករដ្ឋមន្ត្រី និងអង្គពិធី។
ឧបនាយករដ្ឋមន្ត្រី សាយ សំអាល់ បានកោតសរសើរ និង វាយតម្លៃខ្ពស់ ចំពោះគណៈស្ថាបត្យករកម្ពុជា និងសមាគម អ្នកវិនិយោគ អ្នកសាងសង់ និងស្ថាបត្យករ កម្ពុជា ដែលបានខិតខំប្រឹងប្រែងក្នុងការចូលរួមចំណែកលើកកម្ពស់ធនធានមនុស្សលើវិស័យស្ថាបត្យកម្ម និងនគរូបនីយកម្ម ស្របទៅតាមទិសដៅ និងគោលនយោបាយរបស់រាជរដ្ឋាភិបាលកម្ពុជា និងសូមលើកទឹកចិត្តបន្តការជំរុញ និងលើកស្ទួយនេះជាបន្តបន្ទាប់បន្ថែមទៀតផងដែរ។
នាឱកាសនោះដែរ ឧបនាយករដ្ឋមន្ត្រី បានអបអរសាទរដល់ក្រុមបេក្ខជនជ័យលាភីដែលធ្វើបានល្អលើការប្រកួតប្រជែង និងបានអបអរសាទរដល់ប្រទេសកម្ពុជា ដែលមានធនធានមនុស្សពូកែៗកាន់តែច្រើនក្នុងការចូលរួមអភិវឌ្ឍប្រទេសជាតិ។
ឧបនាយករដ្ឋមន្ត្រី សាយ សំអាល់ បានបញ្ជាក់ថា ដើម្បីឱ្យអនាគតរបស់កម្ពុជាកាន់តែភ្លឺស្វាងនោះគឺត្រូវពឹងផ្អែកលើធនធានខួរក្បាល ឬមូលធនមនុស្សជាកត្តាសំខាន់។
ឧបនាយករដ្ឋមន្ត្រី ក៏បានផ្តល់កិត្តិយសថតរូបអនុស្សាវរីយ៍ជាមួយទីប្រឹក្សាកិត្តិយសសមាគម និងប្រគល់លិខិតសរសើរដល់គណៈកម្មការដាក់ពិន្ទុ គ្រូឧទ្ទេស ម្ចាស់ឧបត្ថម្ភកម្មវិធី និងក្រុមការងាររៀបចំកម្មវិធី។ ឧបនាយករដ្ឋមន្ត្រី បានប្រគល់ពាន និងបំពាក់មេដាយ ដល់ក្រុមជ័យលាភីលេខ១ ដល់លេខ៣ ផងដែរ ៕
