យប់ថ្ងៃទី១០ នៃការរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល សមត្ថកិច្ចឃាត់យានយន្តល្មើស ១៩៧គ្រឿង

ភ្នំពេញ៖ លោកវរសេនីយ៍ឯក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ បានឱ្យដឹងថា នៅយប់ថ្ងៃទី១០ គឺយប់ថ្ងៃទី០៣ ខែកុម្ភៈ ឆ្នាំ២០២៤នេះ ការអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល សមត្ថកិច្ចឃាត់យានយន្តល្មើស ចំនួន១៩៧គ្រឿង ក្នុងនោះរថយន្ត ចំនួន៣៨គ្រឿង និងម៉ូតូ ចំនួន១៥៩គ្រឿង។

លោកបន្តថា ការរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុលនេះ ធ្វើឡើងដោយអនុវត្តតាមបទបញ្ជាផ្ទាល់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការដឹកនាំត្រួតពិនិត្យអនុវត្តផ្ទាល់ពី ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ។

លោកវរសេនីយ៍ឯក សំ វិច្ឆិកា បានបញ្ជាក់ថា «នៅយប់ថ្ងៃទី០៣ ខែកុម្ភៈ ឆ្នាំ២០២៤ តាមបណ្តាអធិការដ្ឋាននគរបាលខណ្ឌ បានចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល ឃាត់យានយន្តល្មើស ចំនួន១៩៧គ្រឿង (រថយន្ត ចំនួន៣៨គ្រឿង, ម៉ូតូ ចំនួន១៥៩គ្រឿង) ដែលក្នុងមាន ល្មើសជាតិស្រវឹង ចំនួន៧៧គ្រឿង កម្រិត ០.២៥ – ០.៣៩ mg/L ចំនួន២៨គ្រឿង អ្នកបើកបរម៉ូតូចំនួន១៧នាក់ អ្នកបើកបររថយន្តចំនួន១១នាក់ ដោយឡែក កម្រិត ០.៤០ mg/L ឡើងចំនួន៤៩គ្រឿង មានអ្នកបើកបរម៉ូតូចំនួន១៩នាក់ និងអ្នកបើកបររថយន្តចំនួន៣០នាក់ ចំពោះបទល្មើសផ្សេងៗ ចំនួន១២០គ្រឿង ក្នុងនោះអ្នកមិនពាក់មួកសុវត្ថិភាព ចំនួន១០៩គ្រឿង, គ្មានប័ណ្ណបើកបររថយន្តចំនួន០៨គ្រឿង និងម៉ូតូកែច្នៃសុីមាំងចំនួន០៣គ្រឿង ចំពោះវិធានការអប់រំចំនួន៨៨គ្រឿង, អប់រំអ្នកបើកបរមានជាតិអាល់កុលក្រោម ០.២៥ mg/L ចំនួន១៨នាក់ ក្នុងនោះ អ្នកបើកបរម៉ូតូចំនួន០៥នាក់ និងអ្នកបើកបររថយន្តចំនួន១៣នាក់, អប់រំអ្នកបើកបរផ្សេងៗ(មិនពាក់មួកសុវត្ថិភាព)ចំនួន៧០នាក់»។

ក្នុងនោះផងដែរលោកវរសេនីយ៍ឯក សំ វិច្ឆិកា បានហាមដាច់ខាតមិនឱ្យមានការអន្តរាគមន៍ ក្នុងករណីណាមួយដែលមានការអន្តរាគមន៍ពាក់ព័ន្ធការល្មើសច្បាប់ចរាចរណ៍ផ្លូវគោក ជាពិសេសអ្នកបើកបរទទួលទានជាតិស្រវឹង និងធ្វើរបាយការណ៍ជូនថ្នាក់ដឹកនាំ។

ជាមួយគ្នានោះលោកអ្នកនាំពាក្យបានអំពានាវដល់ប្រជាពលរដ្ឋដែលធ្វើដំណើរនៅតាមដងផ្លួវសាធារណៈ ត្រូវមានការចូលរួមគោរពច្បាប់ចរាចរណ៍ផ្លូវគោកឱ្យបានគ្រប់គ្នា ជាពិសេសនៅក្នុងរាជធានីភ្នំពេញ ដោយអត្រាគ្រោះថ្នាក់ចរាចរណ៍មានបញ្ហាកើនឡើងនៅពេលយប់។ ដូច្នេះ ប្រជាពលរដ្ឋត្រូវមានការប្រុងប្រយ័ត្នឱ្យបានខ្ពស់ និងកុំពិសារគ្រឿងស្រវឹងនៅពេលបើកបរ ៕