សម្តេចធិបតី៖ សេដ្ឋកិច្ចជាតិមិនអាចមានលំនឹងទេ ប្រសិនបើសេដ្ឋកិច្ចពលរដ្ឋគ្មានលំនឹង

ភ្នំពេញ៖ ថ្លែងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា នាព្រឹកថ្ងៃទី០៦ ខែកុម្ភៈ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា សេដ្ឋកិច្ចជាតិមិនអាចមានលំនឹងទេ ប្រសិនបើសេដ្ឋកិច្ចប្រជាពលរដ្ឋគ្មានលំនឹង។

ក្នុងឱកាសនេះ សម្តេចធិបតី ហ៊ុន ម៉ាណែត បានមានប្រសាសន៍ថា គោលនយោបាយគាំពារសង្គមរបស់រាជរដ្ឋាភិបាល គឺជាគោលនយោបាយ ជួយប្រជាពលរដ្ឋក្នុងរយៈពេលខ្លី ហើយអាចឱ្យគាត់មានលទ្ធភាពរស់ក្នុងរយៈពេលវែង ហើយគោលនយោបាយរបស់រាជរដ្ឋាភិបាលអាណត្តិទី៧ នៅតែបន្តរក្សាគោលនយោបាយគាំពារសង្គម។

ជាមួយគ្នានេះ សម្តេចធិបតីនាយករដ្ឋមន្ត្រី ក៏បានបញ្ជាក់ផងដែរថា គោលនយោបាយគាំពារសង្គម មិនមែនជាការបង្កើតវប្បធម៌ពឹងផ្អែកនោះទេ ប៉ុន្តែផ្ទុយទៅវិញ គឺជាការបង្កើតនូវវប្បធម៌ម្ចាស់ការ ជាការជួយពលរដ្ឋពេលមានបញ្ហា និងជួយទប់កុំឱ្យស្ថានភាពជីវភាពធ្លាក់ក្នុងស្ថានភាពលំបាក ៕