កម្មវិធីចង្ក្រានសប្បុរស រួមគ្នានាំយកអំណោយ ៣១មុខ ទៅចែកជូនពលរដ្ឋជួបការលំបាក នៅសង្កាត់បឹងកក់២

ភ្នំពេញ៖ ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធាន អង្គភាពប្រឆាំងអំពើពុករលួយ និងជាប្រធានក្រុមការងារថ្នាក់ជាតិ ចុះជួយខណ្ឌទួលគោក និងឯកឧត្ដម លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា ព្រមជាមួយ លោកជំទាវ ឈីវ ភិរម្យ ស្ថាបនិកនៃ កម្មវិធីចង្ក្រានសប្បុរស រួមជាមួយ និងសប្បុរសជនជា មេធាវី មិនមែនមេធាវី និង ក្រុមហ៊ុន ឯកជន បានរួមគ្នានាំ យកអំណោយចំនួន ៣១ មុខ ទៅចែកជូន ប្រជាពលរដ្ឋ ជួបការលំបាក ដែលរស់នៅ ភូមិទី២១ សង្កាត់បឹងកក់២ ខណ្ឌទួលគោក រាជធានីភ្នំពេញ កាលពីថ្ងៃទី៥ ខែកុម្ភៈ ឆ្នាំ២០២៤ ។

មានប្រសាសន៍ សំណេះសំណាល ទៅកាន់បងប្អូន ប្រជាពលរដ្ឋ នៅក្នុង ឱកាសនេះ ឯកឧត្ដម លី ច័ន្ទតុលា បានលើកឡើងថា កម្មវិធីចង្ក្រានសប្បុរស ត្រូវបានបង្កើតឡើង នៅឆ្នាំ២០២១ នៅក្នុងកំឡុងពេល ដែលកម្ពុជារងនូវជំងឺកូវីដ ១៩ ខណៈពេលដែល បិទខ្ទប់ ហើយក៏បានបន្ត រហូតមកដល់បច្ចុប្បន្ន។
ចាប់ពីឆ្នាំ២០២១ ដល់ឆ្នាំ២០២៣ កម្មវិធីចង្ក្រានសប្បុរស រៀបចំកម្មវិធីបាន ២២លើកហើយ ដែលជាការចូលរួមចំណែកជាមួយរាជរដ្ឋាភិបាល ជួយដល់បងប្អូនប្រជាពលរដ្ឋដែលខ្វះខាតបាន៩០៧០ គ្រួសារមកហើយ។ ដោយឡែក កាលពីព្រឹកថ្ងៃទី៥ ខែកុម្ភៈ ឆ្នាំ២០២៤ នេះ កម្មវិធីចង្ក្រាន សប្បុរសលើកទី២៣ បានរួមគ្នា ចុះជួយដល់បងប្អូន ប្រជាពលរដ្ឋចំនួន ១២០ គ្រួសារបន្ថែមទៀត ដែលធ្វើអោយចំនួន គ្រួសារសរុបដែល បានទទួលជំនួយពីចង្ក្រានសប្បុរស មានចំនួន ៩១៩០ គ្រួសារ។

ឯកឧត្តម លី ច័ន្ទតុលា បានលើកឡើងថា ក្នុងពេលបច្ចុប្បន្ន ដែលប្រទេសមានសន្តិភាពគ្រប់គ្រាន់ ប្រជាពលរដ្ឋទាំងអស់មិនខ្វះហូបដូចក្នុងរបបប៉ុលពត ឬ នៅក្នុងពេលសង្រ្គាមទៀតនោះទេ តែអចស្ទើរឆ្ងាញ់បន្តិច ឬ អាចឆ្ងាញ់បានមិនសូវច្រើនពេល។ កម្មវិធីចង្ក្រានសប្បុរស មានគោលបំណងជូនឆ្ងាញ់ មួយពេល ដល់ប្រជាពលរដ្ឋ ដែលមានជីវភាពខ្វះខាត រួមជាមួយនិងគ្រឿងទេសមួយចំនួន។ ក្រៅពីការសួរសុខទុក្ខសំណេះសំណាល ឯកឧត្តម លី ច័ន្ទតុលា បានស្នើសុំបងប្អូនប្រជាពលរដ្ឋដែលមកទទួលអំណោយអោយចូលរួមអនុវត្ត គោលការណ៌កម្មវិធីចង្ក្រានចំនួន ៣ ចំនូច។

ទី១គឺ សុំអោយបងប្អូនប្រជាពលរដ្ឋ ប្រឹងប្រែង បញ្ជូនកូនចៅ សមាជិកគ្រួសារ អោយបានទៅរៀន រៀនអោយបានពូកែ រៀនអោយបានខ្ពស់ អោយអស់លទ្ធភាពពីខ្លួន។
ទី២ សុំអោយបងប្អូនប្រជាពលរដ្ឋមានកតញ្ញូតាធម៌ ដឹងគុណសន្តិភាព និង នឹករលឹកដឹងគុណដល់ស្ថាបនិកនៃសន្តិភាព នោះគឺសម្តេចតេជោហ៊ុនសែន ដែលបានប្តូរជីវិត ទៅយកសន្តិភាពមក ហើយនិងបាន ថែរក្សាសន្តិភាព មកដល់បច្ចុប្បន្ន។
ទី៣ ឯឧ លី ច័ន្ទតុលា លើកទឹកចិត្តបងប្អូនប្រជាពលរដ្ឋ ដែលមកទទួលអំណោយ ចូលរួមសកម្មភាព ចែករំលែកបន្ត តាមលទ្ធភាពដែលអាចធ្វើបាន។
ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានមានប្រសាសន៍ កោតសរសើរចំពោះ ឯកឧត្ដម លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា ព្រមជាមួយលោកជំទាវ ឈីវ ភិរម្យ ស្ថាបនិកនៃ កម្មវិធីចង្ក្រានសប្បុរស ដែលបានដឹកនាំក្រុមការងារជាមេធាវី រួមជាមួយនិងសប្បុរសជននៃក្រុមហ៊ុនឯកជន ក្នុងការចុះជួយដល់បងប្អូនប្រជាពលរដ្ឋខ្វះខាត។
លើសពីនេះឯកឧត្តម កិត្តិនីតិកោសលបណ្ឌិតក៏បានលើកឡើងពីការងារដ៏សកម្មនៃគណៈមេធាវី ក្នុងផ្តល់ជូនសេវាកម្មប្រឹក្សាយោបល់ផ្នែកច្បាប់ដល់ប្រជាពលរដ្ឋក្រីក្រដោយមិនគិតប្រាក់។

ជាចុងក្រោយ ឯកឧត្តម កិត្តិនីតិកោសលបណ្ឌិត ក៏បានជូន នូវ ពុទ្ធពរ ៤ ប្រការ គឺ អាយុ វណ្ណៈ សុខៈ ពលៈ បានជូននូវពររបស់សម្តេចសង្ឃជួនណាត នោះគឺ បដិភាណៈ និង ពរទាំងពីរ ២ប្រការរបស់សម្តេចហ៊ុនសែន នោះគឺ សន្តិភាព និង ការអភិវឌ្ឍន៌ ជូនទៅក្រុមការងារចង្ក្រានសប្បុរស ក្រុមការងារចុះជួយសង្កាត់ អាជ្ញាធរមូលដ្ឋានគ្រប់ជាន់ថ្នាក់ និងអ្នកចូលរួមទាំងអស់។ កម្មវិធីបានបញ្ចប់ទៅដោយភាពរីករាយ និង ស្និតស្នាលជាទីបំផុត ជាមួយនឹងស្នាមញញឹមចេញពីចិត្តរបស់ប្រជាពលរដ្ឋអ្នកចូលរួមទាំង១២០ គ្រួសារ៕