ទេសរដ្ឋមន្រ្តី ព្រុំ សុខា ណែនាំដល់ក្រសួង-ស្ថាប័នពាក់ព័ន្ធ ត្រូវពិនិត្យអំពីបញ្ជីសារធាតុគីមីផ្សំទាំង៦៩ប្រភេទ ដែលអាជ្ញាធរជាតិប្រយុទ្ធប្រឆាំងគ្រឿងញៀនបានជូនដំណឹង

ភ្នំពេញ៖ ឯកឧត្តមទេសរដ្ឋមន្រ្តី ព្រុំ សុខា អនុប្រធានប្រចាំការអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារអន្តរក្រសួងត្រួតពិនិត្យសារធាតុញៀន និងសារធាតុគីមីផ្សំ នៅព្រឹកថ្ងៃទី៧ ខែកុម្ភៈ ឆ្នាំ២០២៤ បានដឹកនាំកិច្ចប្រជុំក្រុមការងារអន្តរក្រសួងត្រួតពិនិត្យសារធាតុញៀន និងសារធាតុគីមីផ្សំ នៅទីស្តីការក្រសួងមហាផ្ទៃ។

កិច្ចប្រជុំនេះមានការចូលរួមពីឯកឧត្តមរដ្ឋមន្រ្តី រដ្ឋលេខាធិការ តំណាងក្រសួងស្ថាប័ននានា ដែលជាសមាជិកក្រុមការងារអន្តរក្រសួង និងលេខាធិការដ្ឋាន សរុបចំនួន៥៧រូប។

កិច្ចប្រជុំនេះផ្តោតសំខាន់ទៅលើការពិភាក្សាអំពីការបែងចែកសមត្ថកិច្ចដល់ក្រសួង-ស្ថាប័នជំនាញពាក់ព័ន្ធ ក្នុងការគ្រប់គ្រងត្រួតពិនិត្យសារធាតុគីមីផ្សំដែលត្រូវបានអនុញ្ញាតឲ្យនាំចូលមកប្រើប្រាស់ក្នុងសកម្មភាពស្របច្បាប់។​

ក្រៅពីនេះឯកឧត្តមទេសរដ្ឋមន្រ្តី ព្រុំ សុខា ជាប្រធានក្រុមការងារនិងប្រធានអង្គប្រជុំក៏បានជម្រុញ និងណែនាំដល់ការរៀបចំស្តង់ដារនីតិវិធីប្រតិបតិ្ត(SOP) ដើម្បីកំណត់ភារកិច្ចជូនក្រុមការងារអន្តរក្រសួង និងក្រសួង-ស្ថាប័នសាមីពាក់ព័ន្ធ ក្នុងការគ្រប់គ្រងត្រួតពិនិត្យ តាមដាន និងវាយតម្លៃលើការស្នើសុំនាំចូល-ចេញ ការដឹកជញ្ជូន ការចែកចាយ ការប្រើប្រាស់ និងការធ្វើសន្និធិសារធាតុញៀន សារធាតុគីមីផ្សំ និងសារធាតុគីមីពាក់ព័ន្ធនឹងការផលិតគ្រឿងញៀនខុសច្បាប់។

បន្ទាប់ពីពិភាក្សាយ៉ាងផុលផុសរួចមក ឯកឧត្តមទេសរដ្ឋមន្រ្តី ព្រុំ សុខា បានធ្វើការណែនាំដល់សមាជិកក្រុមការងារអន្តរក្រសួង និងលេខាធិការដ្ឋាន ជាពិសេសក្រសួង-ស្ថាប័នជំនាញពាក់ព័ន្ធ ត្រូវពិនិត្យអំពីបញ្ជីសារធាតុគីមីផ្សំទាំង៦៩ប្រភេទ ដែលអាជ្ញាធរជាតិប្រយុទ្ធប្រឆាំងគ្រឿងញៀនបានជូនដំណឹង រួចធ្វើការកំណត់អំពីឈ្មោះសារធាតុគីមីផ្សំណាខ្លះដែលក្រសួង-ស្ថាប័នខ្លួនបានផ្តល់អាជ្ញាប័ណ្ណឱ្យនាំចូលប្រើប្រាស់ និងចែកចាយ ដើម្បីបង្កលក្ខណៈងាយស្រួលក្នុងការតាមដាន និងត្រួតពិនិត្យ។ ចំណែកក្រុមការងារលេខាធិការដ្ឋាននៃក្រុមការងារអន្តរក្រសួងត្រួតពិនិត្យសារធាតុញៀននិងសារធាតុគីមីផ្សំ ដែលមានមន្រ្តីជំនាញមកពីក្រសួង-ស្ថាប័នពាក់ព័ន្ធជាសមាជិក ត្រូវសហការរៀបចំសេចក្តីព្រាងស្តង់ដារនីតិវិធីប្រតិបតិ្ត (SOP) ឱ្យបានឆាប់រហ័ស ដាក់ជូនក្រុមការងារអន្តរក្រសួងពិនិត្យសម្រេច ដើម្បីឈានទៅបន្តការងារនៅជំហានបន្ទាប់ទៀត ៕