សម្តេចធិបតី ហ៊ុន ម៉ាណែត៖ «ត្រកូលហ៊ុន» គ្មានបំណង ឬធ្វើសកម្មភាព ដែលក្បត់ប្រយោជន៍ជាតិនោះឡើយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអះអាងថា «ត្រកូលហ៊ុន» គ្មានបំណង ឬធ្វើសកម្មភាព ដែលក្បត់ប្រយោជន៍ជាតិនោះឡើយហើយក៏មិនធ្វើអ្វីមួយឱ្យប្រាសចាកពីប្រយោជន៍ជាតិនោះឡើយ ទាំងសម្ដេចតេជោ ហ៊ុន សែន និងសម្ដេចធិបតីផ្ទាល់ គឺមានតែប្រឹងដោះស្រាយបញ្ហាជាតិដោយការទទួលខុសត្រូវខ្ពស់។

ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅបន្តឆ្នាំ២០២៤ របស់ក្រសួងការងារ និងបណ្ដុះបណ្ដាលវិជ្ជាជីវៈ នាថ្ងៃទី៨ ខែកុម្ភៈ ឆ្នាំ២០២៤ សម្ដេចធិបតី បានចោទសួរទៅកាន់ក្រុមប្រឆាំងទាំងនោះថា តើការធានាសន្តិសុខថាមពលសម្រាប់ជាតិ ត្រូវចាត់ទុកជាអំពើក្បត់ជាតិមែនឬទេ? សម្ដេចបានពន្យល់វិញថា ការធានាសន្តិសុខថាមពលនេះ គឺជាការខិតខំដើម្បីឈានទៅរកភាពម្ចាស់ការក្នុងវិស័យថាមពលរបស់កម្ពុជា កាត់បន្ថយការបញ្ជាទិញពីបរទេស ផ្ដល់ការងារដល់ប្រជាពលរដ្ឋ បង្កើនចំណូលក្នុងសេដ្ឋកិច្ចជាតិ និងនាំផលប្រយោជន៍ជាច្រើនទៀតដល់ជាតិ។

សម្ដេចធិបតី ហ៊ុន ម៉ាណែត បានបញ្ជាក់ថា ផលប្រយោជន៍សេដ្ឋកិច្ច និងការសិក្សារួមគ្នានេះមិនបានធ្វើឱ្យបាត់អធិបតេយ្យភាពព្រំដែននោះទេ។

សម្ដេចបានបន្តថា ការចរចាព្រំដែនទឹក ត្រូវតែបន្តធ្វើតាមរយៈក្រុមបច្ចេកទេស។ សម្ដេចធិបតី បានរំលឹកនូវការខិតខំតរបស់សម្ដេចតេជោ ហ៊ុន សែន ដែលបានដាក់ទិសដៅចរចារឿងព្រំដែន ក៏ព្រោះតែកុំឱ្យកូនខ្មែរជំនាន់ក្រោយមានទំនាស់ជាមួយប្រទេសជិតខាងតទៅទៀត យើងចរចាដោយបច្ចេកទេសច្បាស់លាស់តាមរយៈ «រដ្ឋលេខាធិការដ្ឋានកិច្ចការព្រំដែន» តួយ៉ាងដូចជាព្រំដែនសមុទ្រជាមួយភាគីថៃនេះ គឺមន្ត្រីរាជការកម្ពុជាចរចាជាមួយភាគីពាក់ព័ន្ធដាច់បាយដាច់ទឹក ហើយត្រូវជិះកប៉ាល់ចូលទៅពិនិត្យនៅតាមសមុទ្រជាក់ស្ដែង ៕