គណបក្សប្រជាជនកម្ពុជាខេត្តកំពង់ឆ្នាំង បើកយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានីតិកាលទី៥

ភ្នំពេញ៖ នៅព្រឹកថ្ងៃទី១០ ខែកុម្ភៈ ឆ្នាំ២០២៤ គណបក្សប្រជាជនកម្ពុជា ខេត្តកំពង់ឆ្នាំង បានរៀបចំកម្មវិធីបើកយុទ្ធនាការដង្ហែក្បួនឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥នៅក្នុងក្រុងកំពង់ឆ្នាំង។

ពិធីនេះធ្វើឡើងក្រោមអធិបតីឯកឧត្ដមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងារគណបក្សចុះមូលដ្ឋាន ខេត្តកំពង់ឆ្នាំង និងឯកឧត្ដម ស៊ុន សុវណ្ណារិទ្ធិ ប្រធានគណៈកម្មាធិការគណបក្សប្រជាជនកម្ពុជា ខេត្តកំពង់ឆ្នាំង និងសមាជិកថ្នាក់កណ្ដាលចុះជួយខេត្តកំពង់ឆ្នាំង សមាជិក សមាជិកាគណបក្សប្រជាជនកម្ពុជា មកពីតាមបណ្ដាក្រុង ស្រុកទាំង៨ ចំនួន១៥,១២០នាក់។

យុទ្ធនាការនេះដោយប្រើប្រាស់មធ្យោបាយរថយន្ត, ម៉ូតូធំ, ម៉ូតូ, ម៉ូតូកង់, ក្រុមសិល្បឆៃយ៉ាំ៩វង់ មេក្រូធុងបាស់ច ល័ត, តន្ត្រីសម័យ, ក្រុមរបាំ១ក្រុមផងដែរចូលរួមសម្ដែងកំដរបរិយាកាសក្នុងអង្គពិធីខាងលើនេះផងដែរ ក្បួនដង្ហែរបស់គណបក្សក្រុង ស្រុកបានដង្ហែចូលមកកាន់វេទិកាប្រារព្ធពិធីនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។

បន្ទាប់មកក្បួនដង្ហែបើកយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភាក៏បានដំណើរ ការដង្ហែលើផ្លូវជាតិលេខ៥ ពីចំណុចភូមិទួលក្រឡាញ់មកកាន់វង្វង់មូលវិមានឯករាជ្យ និងបន្តហែវិលទៅកាន់មូលដ្ឋាន គណបក្សប្រជាជនក្រុង ស្រុកទាំង៨ ក្នុងខេត្តកំពង់ឆ្នាំងវិញ ដោយសុវត្ថិភាព៕