នាយករដ្ឋមន្ត្រី ណែនាំឱ្យពិនិត្យលើយន្តការ នៃការធ្វើអធិការកិច្ច ដើម្បីធ្វើយ៉ាងណាកុំឱ្យអនុវត្តជាន់តួនាទីភារកិច្ចគ្នា

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ច និងហិរញ្ញវត្ថុ ឱ្យពិនិត្យលើយន្តការនៃការធ្វើអធិការកិច្ច ដើម្បីធ្វើយ៉ាងណាកុំឱ្យអនុវត្តជាន់តួនាទីភារកិច្ចគ្នា។

ក្នុងឱកាសអញ្ជើញជាអធិបតី ក្នុងពិធីបិទសន្និបាតបូកសរុបការងារ ឆ្នាំ២០២៣ និងលើកទិសដៅការងារ ឆ្នាំ២០២៤ របស់ក្រសួងអធិការកិច្ច នាថ្ងៃទី១៣ ខែកុម្ភៈ ឆ្នាំ២០២៤ សម្តេចធិបតី ថ្លែងថា «ពេលខ្លះមានការលំបាកដែរ ឥឡូវនៅថ្នាក់ជាតិយើងមាន៤ស្ថាប័ន ដែលធ្វើការងារអធិការកិច្ចនេះ មានអាជ្ញាធរសវនកម្មជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងអធិការកិច្ច ​ក្រសួងមុខងារសាធារណៈ ដែលមានសិទ្ធិធ្វើអធិការកិច្ចនៅតាមក្រសួង ស្ថាប័នថ្នាក់ក្រោមជាតិ រហូតដល់ថ្នាក់ខេត្ត»។

សម្តេចបញ្ជាក់បន្ថែមថា «យើងមើលតែ៣នេះ ចាំបាច់ត្រូវមានទាំង៣ ឬកន្លែងខ្លះជាន់គ្នាទៅហើយ អញ្ចឹងត្រួតនៅក្នុងក្រសួង មើលតាមនាយកដ្ឋានមួយៗ ដែលនាយកដ្ឋានខ្លះពីខាងក្រៅមក Audit ផង និងពីខាងក្នុងផង ដែលខ្លះចូល៦-៧ដង លើកិច្ចការតែមួយ»។

សម្តេចធិបតី ក៏បានជំរុញឱ្យក្រសួងស្ថាប័ន ដែលធ្វើអធិការកិច្ច ធ្វើយ៉ាងណាអនុវត្តតាមអនុក្រឹត្យលេខ១៦៨ឱ្យបានល្អ។ សម្តេចបញ្ជាក់ថា «បើជើងយើងច្រើន ដើរព័ន្ធតែគ្នាវាពិបាក បើព័ន្ធដួលទៅគឺដួលទៅលើអង្គភាពថ្នាក់ក្រោម ហើយការងារនេះ២០ឆ្នាំហើយ តាមខ្ញុំដឹង ដែលយើងខិតខំកែសម្រួល»។

សម្តេចបានបំផុសគំនិតថា ពេលនេះកម្ពុជាមានស្ថាប័នអធិការកិច្ចថ្នាក់ជាតិចំនួន៤ ហើយថាតើអាចរៀបចំជាយន្តការកំពូលណាមួយដើម្បីសម្របសម្រួលអនុវត្តយន្តការនេះទេ ឬប្រគល់ភារកិច្ចជូនស្ថាប័នណាមួយដើម្បីដឹកនាំតាមដានត្រួតពិនិត្យលើការងារអធិការកិច្ច ៕