រដ្ឋលេខាធិការក្រសួងសុខាភិបាល អញ្ជើញអបអរទិវាវេជ្ជសាស្រ្ត-សល្យសាស្រ្ត លើកទី២៦ និងថែទាំវេជ្ជសាស្រ្តលើកទី១៣ នៅមន្ទីរពេទ្យរុស្ស៊ី

ភ្នំពេញ៖ នៅថ្ងៃព្រហស្បតិ៍ ទី១៥ ខែមីនា ឆ្នាំ២០២៤ មន្ទីរពេទ្យមិត្តភាពខ្មែរ-សូវៀត បានរៀបចំទិវាវេជ្ជសាស្រ្តសល្យសាស្រ្តលើកទី២៦ និងថែទាំវេជ្ជសាស្រ្តលើកទី១៣ ក្រោមប្រធានបទ« ពិនិត្យព្យាបាលគ្រប់ជ្រុងជ្រោយ និងនវានុវត្តន៍» ក្រោមអធិបតីភាពដ៏ខ្ពង់ខ្ពស់របស់ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាលមន្ទីរពេទ្យមិត្តភាពខ្មែរ-សូវៀត តំណាងដ៏ខ្ពង់ខ្ពស់របស់ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ព្រមទាំងមានការចូលរួមពីឯកឧត្តមសាស្រ្តាចារ្យ វេជ្ជបណ្ឌិត អនុរដ្ឋលេខាធិការ នាយក នាយករងមន្ទីរពេទ្យជាតិ វាគ្មិនជាតិ និងអន្តរជាតិ លោក លោកស្រី សាស្រ្តាចារ្យ វេជ្ជបណ្ឌិត ទន្តបណ្ឌិត ឱសថការី គិលានុបដ្ឋាក បុគ្គលិក មន្រ្តីរាជការ និងនិស្សិតវេជ្ជសាស្រ្តផងដែរ។

ក្នុងឱកាសនេះផងដែរ ឯកឧត្តមសាស្រ្តាចារ្យ កុយ វ៉ាន់នី ក៏បានពាំនាំនូវមតិផ្តាំផ្ញើរបស់ឯកឧត្តមសាស្ត្រាចារ្យរដ្ឋមន្ត្រី ឈាង រ៉ា ដូចខាងក្រោម៖

-ក្នុងដំណាក់កាលបច្ចុប្បន្នដែលកំនើនការមកទទួលសេវានៅអង្គភាពសុខាភិបាលសាធារណៈរបស់បងប្អូនយើងទូទាំងប្រទេសកាន់តែមានសន្ទុះច្រើនគំហុក ពីមួយថ្ងៃទៅមួយថ្ងៃ ដូចនេះសូមអោយការបំរើសេវាសុខាភិបាលគ្រប់កម្រឹត និងគ្រប់ជំនាញឯកទេស ត្រូវតែមានភាពទន់ភ្លន់ ឆ្លើយតបបានទាន់ពេលវេលា និងស្ថានការណ៍តម្រូវ ដោយឈរលើមូលដ្ឋាន តម្កល់ខ្ពស់ និងដោយប្រកាន់ខ្ជាប់ជានិច្ចនូវ «ក្រមសីលធម៌វិជ្ជាជីវៈវេជ្ជសាស្ត្រ – Medical Ethics » ដើម្បីកាន់តែបង្ខិតអោយបានជិតស្និទ្នបំផុតរវាងយើងអ្នកបម្រើសេវាដោយផ្ទាល់ និងបងប្អូនអ្នកជំងឺយើង សាច់ញាត្តិ មិត្តភក្ត្រ័ទាំងឡាយដែលលោកមកទទួលសេវា និងនៅជាមួយយើង។ យ៉ាងនេះ គឺជាការបង្ករអោយភាពជិតស្និត និង ទំនុកចិត្តកាន់រឹតតែម៉ាំទាំនិងយូរអង្វែង។ ទីចុងបំផុតគឺការកើតឡើងដោយឯកឯងនូវភាពកក់ក្តៅ រីករាយ ពេញចិត្តពេញថ្លើមទាំងអស់គ្នាដោយគ្មានទីបញ្ចប់។

-បន្តបង្កើនការផ្តល់អាទិភាពដល់អ្នជំងឺចាស់ជរាយើង បងប្អូនពិការភាព បងប្អូនជួបលំបាកការខ្វះខ្វាតផ្សេងៗ ធ្វើយ៉ាងណាបង្កលក្ខណៈជូនគាត់ឲ្យបានទទួលសេវាព្យាបាលថែទាំព្យាបាលឆ្លើយតបបានទៅនឹងស្ថានភាពជំងឺជាក់ស្តែងនិងផ្តល់ការពន្យល់ទូលំទូលាយ។
-បង្កើនការបណ្តុះបណ្តាលជំនាញថ្មីៗ ជូនបងប្អូនគ្រូពេទ្យ គិលានុបដ្ឋាក-យិកាយើង ដោយធ្វើទាំងក្នុងមន្ទីរពេទ្យខ្លួន ទាំងអន្តរមន្ទីរពេទ្យ ដូចជាការជួបជុំដ៏ធំក្នុងថ្ងៃនេះជាដើម។

ក្នុងការលើកកម្ពស់ការយល់ដឹងតាមរយៈ ការបណ្តុះបណ្តាលបន្ត ចំណេះដឹងថ្មីៗនិងបទពិសោធន៍ទាំងក្នុង និងនៅក្រៅប្រទេស តាមរយះការចងគ្នារវាងអ្នកជំនាញយើង និងមិត្តភក្ត្រ័ជំនាញអន្តរជាតិ មានជប៉ុន បារាំង សហរដ្ឋអាមេរិក សីង្ហបូរី ថៃឡង់ ។ល។ និង។ល។គឺជា កំលាំងចលករយ៉ាងពិតប្រាកដបង្ហាញពីភាពរឹងម៉ាំនិងជឿជាក់បានពីបងប្អូនប្រជាពលរដ្ឋយើងទូទាំងប្រទេស ក៏ដូចជាមិត្តភក្ត្រ័លើសាកលលោក។