សម្តេចធិបតី៖ គ្មានអ្នកណាមួយហាមកម្ពុជា មិនឱ្យមានមហិច្ឆតាធំ ដើម្បីការអភិវឌ្ឍនោះទេ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា គ្មានអ្នកណាហាមឃាត់កម្ពុជាមិនឱ្យមានមហិច្ឆតាធំ ដើម្បីអភិវឌ្ឍខ្លួនឱ្យបន្តរីកចម្រើននោះទេ ។
ក្នុងពិធីសម្ពោធអគារសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញាបត្រជូននិស្សិតជាង៥ពាន់នាក់ នាថ្ងៃទី១៥ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត បានបញ្ជាក់ថា «គ្មានអ្នកណាមួយហាមកម្ពុជាមិនឱ្យមានមហិច្ឆតាធំដើម្បីការអភិវឌ្ឍនោះទេ កម្ពុជាដាក់ទិសដៅក្លាយជាប្រទេសអ្នកមាននៅឆ្នាំ២០៥០»។
សម្ដេចធិបតីក៏ធ្លាប់បានលើកឡើងរឿងនេះជម្រាបជូនអគ្គលេខាធិការអង្គការសហប្រជាជាតិផងដែរ ហើយអគ្គលេខាធិការបានលាន់មាត់ថា «កម្ពុជាពិតជាមានមហិច្ឆតាខ្ពស់ណាស់!» សម្ដេចធិបតីក៏បានបញ្ជាក់ទៅវិញថា «ទាល់តែយើងដាក់ទិសដៅខ្ពស់ ទើបយើងប្រឹងអស់លទ្ធភាព ដើម្បីធានានូវភាពម្ចាស់ការរបស់យើង»។
សម្ដេចធិបតីបន្ថែមថា កម្ពុជាមិនត្រឹមតែមានមហិច្ឆតាគិតធំទេ តែក៏បានគិតមុន មានបុរេសកម្ម និងការព្យាករទៅអនាគត ដើម្បីប្រទេសជាតិអាចម្ចាស់ការខ្លួនឯង។
សម្ដេចធិបតីនាយករដ្ឋមន្ត្រីបានបន្តថា ជាការពិតណាស់ កិច្ចការមួយចំនួនធនធានមនុស្សរបស់កម្ពុជាមិនទាន់ធ្វើបានដោយខ្លួនឯងនោះទេ តែយើងនៅតែបង្កើនសមត្ថភាពធនធានមនុស្សរបស់យើងរាល់ថ្ងៃ ដើម្បីឈានទៅភាពម្ចាស់ការខ្លួនឯង បង្កើតខ្លួនឯង ប្រើប្រាស់ខ្លួនឯង អភិវឌ្ឍកិច្ចការដោយខ្លួនឯង។
សម្តេចធិបតី ហ៊ុន ម៉ាណែត បានរំឭកថា កាលពីឆ្នាំ១៩៩០ជាង រាល់ការសរសេរផែនការរបស់ជាតិ ភាគច្រើនគឺកម្ពុជាពឹងអង្គការដៃគូអភិវឌ្ឍន៍ពីក្រៅប្រទេសឱ្យមកជួយសរសេរ ដោយសារកាលណោះធនធានមនុស្សយើងកំពុងសិក្សានៅក្នុងប្រទេសផង និងទៅទទួលការបណ្ដុះបណ្ដាលនៅក្រៅប្រទេសផង តែបច្ចុប្បន្នកម្ពុជាមានធនធានមនុស្សគ្រប់គ្រាន់ ដូច្នេះរាល់ផែនការទាំងឡាយតាំងពីថ្នាក់ជាតិដល់ថ្នាក់ក្រោមជាតិ គឺត្រូវបានសរសេរដោយមន្ត្រីរាជការខ្មែរ អ្នកជំនាញជនជាតិខ្មែរ ៕
