អ៊ីរ៉ង់ថ្កោលទោសការយល់ព្រមពីព្រឹទ្ធសភាអាមេរិកលើកញ្ចប់ជំនួយ ១៤ពាន់លានដុល្លារសម្រាប់អ៊ីស្រាអែល

តេហេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani កាលពីថ្ងៃអាទិត្យ បានថ្កោលទោសព្រឹទ្ធសភាសហរដ្ឋអាមេរិក ចំពោះការអនុម័តកញ្ចប់ជំនួយចំនួន ១៤ពាន់លានដុល្លារសម្រាប់អ៊ីស្រាអែល ដែលលោកបានបញ្ជាក់ថា នឹងអនុញ្ញាតឱ្យមានការសម្លាប់ជនជាតិអ៊ីស្រាអែលកាន់តែច្រើននៅក្នុងតំបន់ហ្គាហ្សាស្ទ្រីប។

លោក Kanaani បានធ្វើអត្ថាធិប្បាយនៅលើវេទិកាប្រព័ន្ធផ្សព្វផ្សាយសង្គម X ដើម្បីឆ្លើយតបទៅនឹងច្បាប់ដែលបានអនុម័តកាលពីថ្ងៃទី១៣ ខែកុម្ភៈដោយព្រឹទ្ធសភាសហរដ្ឋអាមេរិកសម្រាប់ជំនួយសន្តិសុខដល់អ៊ីស្រាអែល។

លោកបានបន្តថាការសម្រេចចិត្តរបស់ព្រឹទ្ធសភាអាមេរិកដែលផ្តល់មូលនិធិដោយអ្នកបង់ពន្ធអាមេរិកបានបង្ហាញថានាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋាភិបាលរបស់ខ្លួននឹងទទួលបាន ១០០លានដុល្លារក្នុងមួយថ្ងៃពីសហរដ្ឋអាមេរិកសម្រាប់ការសម្លាប់ជនស៊ីវិលប៉ាឡេស្ទីនស្លូតត្រង់។

ព្រឹទ្ធសភាសហរដ្ឋអាមេរិកបានអនុម័តច្បាប់នេះដោយសំឡេង ៧០ ទល់នឹង ២៩។ វារួមបញ្ចូលជំនួយសន្តិសុខចំនួន ១៤ពាន់លានដុល្លារដល់អ៊ីស្រាអែល ក្នុងចំណោមរបស់ផ្សេងទៀតផងដែរ។

ចំណាត់ការរបស់ព្រឹទ្ធសភាអាមេរិកបានប្រឈមមុខនឹងការរិះគន់យ៉ាងទូលំទូលាយនៅក្នុងប្រទេស ដោយក្រុមប្រឆាំងបានឲ្យដឹងថា ប្រាក់នេះអាចត្រូវបានចំណាយលើតម្រូវការក្នុងស្រុកជាជាងអាវុធ ហើយសម្តែងការព្រួយបារម្ភអំពីចំនួនអ្នកស្លាប់នៅក្នុងតំបន់ហ្គាហ្សា។

វាមិនច្បាស់ទេថាតើវិក័យប័ត្រនេះនឹងអនុម័តឬយ៉ាងណា ខណៈដែលអ្នកសាធារណរដ្ឋអភិរក្សនិយមមួយចំនួននៅក្នុងសភាអាមេរិកបានប្តេជ្ញាថានឹងបញ្ឈប់វា។

ប្រភព៖ Xinhua Net

ប្រែសម្រួលដោយ៖ ឡាយ លីហួ