ឧត្តមសេនីយ៍ត្រី អ៊ុំ សុភា នាំយកអំណោយសម្ដេចធិបតី ហ៊ុន ម៉ាណែត និងលោកជំទាវ ឧបត្ថម្ភដល់ពលរដ្ឋក្រីក្រ ត្រូវភ្លើងឆេះផ្ទះក្នុងសាមគ្គីមានជ័យ

ភ្នំពេញ៖ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃចន្ទ ទី១៩ ខែកុម្ភៈ ឆ្នាំ២០២៤ បាននាំយកអង្ករចំនួន ១០០គីឡូក្រាម ស័ង្កសី១០០សន្លឹក ស៊ីម៉ង់ត៍១០បេ ទឹកត្រី០២យួរ ទឹកស៊ីអ៉ីវ០២យួរ ត្រីខ០២យួរ មី០២កេះ មុង០២ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ទៅឧបត្ថម្ភដល់គ្រួសារប្រជាពលរដ្ឋ ចំនួន០២គ្រួសារ ដែលត្រូវភ្លើងឆេះផ្ទះអស់ទាំងស្រុង ក្នុងនោះផ្ទះទី១ ម្ចាស់ឈ្មោះ ឌូ ឪ ភេទប្រុសអាយុ ៨៦ឆ្នាំ ទំហំ ៥x ៦ម៉ែត្រ និង ផ្ទះទី២ ជាផ្ទះរបស់កូនសង់ជិតគ្នា ឈ្មោះ ហេង សឿន ភេទស្រីអាយុ ៤៦ឆ្នាំ ។
ដោយសារផ្ទះនេះគឺរស់នៅក្នុងព្រៃដាច់ស្រយាលពីភូមិចម្ងាយ៧គីឡូម៉ែត្រ ហើយម្ចាស់ផ្ទះមិននៅ នៅតែកូនម្នាក់ស្រីអាយុ ៥៥ឆ្នាំ គាត់ងងឹតភ្នែក និង ថ្លង់ស្ដាប់មិនឮ ។

មានប្រសាសន៍សំណេះសំណាល នាពេលនេះ ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខ និងចូលរួមសោកស្តាយជាទីបំផុតរបស់ សម្តេចធិបតី និងលោកជំទាវ ចំពោះគ្រួសាររងគ្រោះដែលបាត់បង់ផ្ទះសម្បែងអស់ទាំងស្រុងត្រឹមមួយប៉ព្រិចភ្នែក ។

ឯកឧត្តម មេបញ្ជាការ បានណែនាំដល់ក្រុមគ្រួសារម្ចាស់ផ្ទះរងគ្រោះទៅថ្ងៃខាងមុខត្រូវប្រុងប្រយ័ត្នឲ្យបានខ្ពស់ចំពោះភ្លើងផ្សែង ដូចពាក្យចាស់ពោលថា ស៊ូលិចទូកកណ្តាលទន្លេ កុំឲ្យតែភ្លើងឆេះផ្ទះ ។

មុននឹងបញ្ចប់ ឯកឧត្តម មេបញ្ជាការ បានណែនាំដល់អាជ្ញាធរភូមិឃុំឲ្យជួយសាងសង់ផ្ទះជូនគ្រួសាររងគ្រោះឡើងវិញ ឲ្យបានសមរម្យ នឹងបានឆាប់រហ័សផងដែរ ។