ប្រមុខរាជរដ្ឋាភិបាល លើកទឹកចិត្តវិស័យឯកជន ពិសេសអ្នកសេដ្ឋកិច្ចក្រៅប្រព័ន្ធ រួមគ្នាដើម្បីក្លាយជាកម្លាំងសេដ្ឋកិច្ចធំមួយ

ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត បានថ្លែងលើកទឹកចិត្តឲ្យវិស័យឯកជន ជាពិសេសអ្នកសេដ្ឋកិច្ចក្រៅប្រព័ន្ធ ស្វែងយល់ និងចាប់យកគោលនយោបាយ ដែលរាជរដ្ឋាភិបាលផ្តល់ជូន ដើម្បីធ្វើការងាររួមគ្នា​ បង្កើនជាកម្លាំងសេដ្ឋកិច្ចធំមួយ ។

ក្នុងពិធីបិទសន្និបាតបូកសរុប លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នាថ្ងៃទី២១ កុម្ភៈនេះ សម្តេចធិបតី មានប្រសាសន៍ថា ប្រទេសយើងតូច តែបើយើងរួមគ្នាជាដៃគូរវាងវិស័យឯកជន និងរាជរដ្ឋាភិបាល គឺជាកិច្ចការងារល្អ ជាកម្លាំងធំមួយ ។

សម្តេចធិបតី ថ្លែងថា កុំភ្លេចថាយើងផលិត ទាំងផ្គត់ផ្គង់ក្នុងស្រុក ទាំងក្រៅស្រុក សូម្បីតែក្នុងស្រុក ក៏យើងត្រូវផលិតប្រកួតប្រជែង ជាមួយផលិតផលនាំចូលពីខាងក្រៅដែរ ព្រោះយើងមិនអាចបិទប្រទេសយើងបានទេ ព្រោះយើងក៏ត្រូវបើកនាំចេញរបស់យើងទៅក្រៅ ចឹងក៏ត្រូវឲ្យគេចូល ចឹងបើយើងរួមគ្នា ជាសិប្បកម្ម ជាអ្វីរួមគ្នា អាចប្រមូលទុន ប្រមូលជំនាញ ប្រមូលអ្វី អាចផលិតបានប្រកួតប្រជែង ព្រោះយើងមិនអាចដាក់ច្បាប់ បិទមិនឲ្យចូល មានតែយកច្នៃប្រឌិតរបស់យើង ផលិតភាពរបស់យើង ដើម្បីប្រកួត បានន័យថា អតិថិជនយើង ថ្ងៃមួយគាត់នឹងមកទិញ ផលិតផលក្នុងស្រុករបស់យើង ដោយមិនចាំបាច់បង្ខំគាត់ ចឹងហើយបានទាមទារ នូវការជួយរបស់រាជរដ្ឋាភិបាល ការផ្គុំកម្លាំងគ្នារបស់សិប្បកម្មរបស់យើង របស់សហគ្រាសរបស់យើង ដែលផលិតដូចគ្នានោះ រួមគ្នាធ្វើការ ។

សម្តេចធិបតី គូសបញ្ជាក់ថា បើមិនប្រមូលកម្លាំងទេ យើងប្រកួតមិនឈ្នះគេទេ ។ សម្ដេចថា ​ប្រសិនបើយើងកាន់តែប្រកួតគ្នាឯងទៀត ទៅលើទីផ្សារតូចនេះ គឺយើងកាន់តែលំបាក ៕