នាយករដ្ឋមន្ត្រីអង់គ្លេស៖ លោកខាងលិចគួរតែក្លាហានក្នុងការរឹបអូសទ្រព្យសម្បត្តិរុស្ស៊ី

បរទេស៖ នាយករដ្ឋមន្ត្រីអង់គ្លេស លោក Rishi Sunak បានឲ្យដឹងថា ប្រទេសលោកខាងលិចគួរតែមានភាពក្លាហានអំពីការរឹបអូសទ្រព្យសម្បត្តិរបស់រុស្ស៊ី ដែលពួកគេបានបង្កកបន្ទាប់ពីការលុកលុយប្រទេសអ៊ុយក្រែនទាំងស្រុងក្នុងឆ្នាំ២០២២។

លោក Rishi Sunak នៅក្នុងអត្ថបទមួយនៅក្នុងការបោះពុម្ពដំបូងរបស់កាសែត Sunday Times ដើម្បីរំលឹកពីរឆ្នាំចាប់តាំងពីការចាប់ផ្តើមនៃជម្លោះបានឲ្យដឹងថាអ៊ុយក្រែននៅតែបន្តត្រូវការអាវុធរយៈចម្ងាយឆ្ងាយបន្ថែមទៀត យន្តហោះគ្មានមនុស្សបើក និងគ្រាប់បែក ក៏ដូចជាជំនួយផ្សេងទៀត។

លោកបានបញ្ជាក់ថា យើងត្រូវតែមានភាពក្លាហានក្នុងការវាយលុកសេដ្ឋកិច្ចសង្រ្គាមរបស់រុស្ស៊ី ហើយយើងត្រូវតែមានភាពក្លាហានក្នុងការរឹបអូសទ្រព្យសម្បត្តិរុស្ស៊ីរាប់រយពាន់លានដែលបង្កក។

កាលពីខែមុន រដ្ឋមន្ត្រីក្រសួងវិនិយោគរបស់អង់គ្លេស លោក Dominic Johnson បានជួបជាមួយអនុរដ្ឋមន្ត្រីក្រសួងរតនាគារអាមេរិក លោក Wally Adeyemo ដើម្បីពិភាក្សាអំពីការរឹបអូសទ្រព្យសម្បត្តិរបស់រុស្ស៊ី ដែលបានបង្កក ប៉ុន្តែបានសង្កត់ធ្ងន់ថា ចាំបាច់ត្រូវធ្វើឡើងស្របតាមច្បាប់អន្តរជាតិ។

សហភាពអឺរ៉ុប សហរដ្ឋអាមេរិក ជប៉ុន និងកាណាដា បានបង្កកទ្រព្យសម្បត្តិធនាគារកណ្តាលរុស្ស៊ីប្រមាណ ៣០០ពាន់លានដុល្លារក្នុងឆ្នាំ២០២២ នៅពេលដែលរុស្ស៊ីបានឈ្លានពានអ៊ុយក្រែន។

ក្រុមប្រទេសទាំងប្រាំពីរបាននិងកំពុងសិក្សាការរឹបអូសទ្រព្យសម្បត្តិដែលអាចមានជាមធ្យោបាយមួយដើម្បីឱ្យរុស្ស៊ីបង់ប្រាក់សម្រាប់ការខូចខាតការលុកលុយរបស់ខ្លួនដែលបង្កឡើងនៅអ៊ុយក្រែន។

លោក Rishi Sunak ក៏បានជំរុញឱ្យសហរដ្ឋអាមេរិកបន្តផ្តល់ជំនួយផ្នែកហិរញ្ញវត្ថុ និងយោធាសម្រាប់អ៊ុយក្រែន។

លោកបានសរសេរនៅក្នុងអត្ថបទថា យើងមិនគួរមើលស្រាលអ្វីដែលអាមេរិកបានធ្វើសម្រាប់អ៊ុយក្រែន និងសម្រាប់សន្តិសុខ Euro-Atlantic នោះទេ។ ខ្ញុំជំរុញឱ្យពួកគេបន្តការគាំទ្រនោះ ហើយខ្ញុំជឿជាក់ថាពួកគេនឹង។

ក្រសួងការពារជាតិរបស់ចក្រភពអង់គ្លេសបានប្រកាសផ្តល់ជំនួយចំនួន ២៤៥លានផោន (៣១១លានដុល្លារ) ដើម្បីផ្តល់មូលនិធិដល់គ្រាប់កាំភ្លើងធំរបស់អ៊ុយក្រែនកាលពីថ្ងៃសៅរ៍។

ប្រភព៖ CNBC

ប្រែសម្រួលដោយ៖ ឡាយ លីហួ