ឯកឧត្តម អ៊ុក រ៉ាប៊ុន៖ ប្រព័ន្ធស្បៀងរបស់យើងចាំបាច់ត្រូវតែមានភាពបៃតង និងប្រកបដោយចីរភាព

ភ្នំពេញ៖ នៅទីស្តីការគណៈរដ្ឋមន្ត្រី នាព្រឹកថ្ងៃទី២៨ ខែកុម្ភៈ ឆ្នាំ២០២៤ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ(ក.ក.ជ.) និងជាប្រធានគណៈកម្មាធិការជាតិជំរុញចលនាភូមិ១ផលិតផល១(គ.ជ.ភ១.ផ១.) បានអញ្ជើញជាអធិបតីក្នុងវេទិកាសន្តិសុខស្បៀង និង អាហារូបត្ថម្ភលើកទី៨០។

ថ្លែងក្នុងឱកាសបើកវេទិកានេះ ឯកឧត្តមបណ្ឌិតសភាចារ្យទេសរដ្ឋមន្រី្តបានគូសបញ្ជាក់អំពីសារៈសំខាន់នៃវេទិកានេះដែលត្រូវបានរៀបចំឡើងក្នុងគោលបំណង ផ្តល់ឱកាសដល់អ្នកពាក់ព័ន្ធចែករំលែកនូវបទពិសោធន៍ ចំណេះដឹង ព័ត៌មានកម្មវិធី និងគម្រោងនានាទាក់ទងនឹងវិស័យសន្តិសុខស្បៀង និងអាហារូបត្ថម្ភរបស់កម្ពុជា។

ឯកឧត្តមបណ្ឌិតសភាចារ្យ បានចែករំលែកអំពីគោលគំនិតនៃសន្តិសុខស្បៀង អាហារូបត្ថម្ភ និងប្រព័ន្ធស្បៀងនៅក្នុងបរិបទនៃការប្រែប្រួលអាកាសធាតុ។

ទាក់ទងនឹងបញ្ហានេះ ឯកឧត្តមបណ្ឌិតសភាចារ្យបានសង្កត់ធ្ងន់ពីបរិវត្តកម្មប្រព័ន្ធស្បៀងក្នុងបរិបទនៃការប្រែប្រួលអាកាសធាតុដែលជារឿងដ៏ចាំបាច់ ដើម្បីឈានឆ្ពោះទៅសម្រេចឱ្យបាននូវគោលដៅទី២ នៃក្របខណ្ឌគោលដៅអភិវឌ្ឍន៍ប្រកបដោយចីរភាពកម្ពុជា គឺបញ្ចប់ភាពអត់ឃ្លាន សម្រេចឱ្យបានសន្តិសុខស្បៀង និងអាហារូបត្ថម្ភមានភាពកាន់តែប្រសើរ និងលើកកម្ពស់កសិកម្មប្រកបដោយចីរភាព។

ឯកឧត្តមបណ្ឌិតសភាចារ្យ ក៏បានលើកឡើងនូវបញ្ហាប្រឈម គឺស្ថានភាពសន្តិសុខស្បៀង និងអាហារូបត្ថម្ភនៅមិនទាន់មានភាពប្រសើរឡើងស្របតាមមហិច្ឆតារបស់រាជរដ្ឋាភិបាលទេ ដែលក្នុងនោះការកាត់បន្ថយបញ្ហាស្គមស្គាំងរបស់កុមារនៅទ្រឹងត្រឹម ៩.៨% ចាប់តាំងពីឆ្នាំ២០១៤មក ហើយបញ្ហាលើសទម្ងន់ ជំងឺធាត់ និងជំងឺមិនឆ្លងកំពុងកើនឡើងក្នុងអត្រាខ្ពស់គួរឱ្យបារម្ភ ដែលតម្រូវឱ្យគ្រប់តួអង្គពាក់ព័ន្ធរួមគ្នាធ្វើការដោះស្រាយជាបន្ទាន់។

នៅក្នុងវេទិកានេះ ក៏មានការធ្វើបទបង្ហាញ និងពិភាក្សាលើអាទិភាពឆ្នាំ២០២៤ របស់ចលនាបង្កើនអាហារូបត្ថម្ភនៅកម្ពុជា កម្មវិធីអប់រំអាហារូបត្ថម្ភសម្រាប់បុគ្គលិកសុខាភិបាលក្នុងតំបន់អាស៊ីអាគ្នេយ៍ ការលើកកម្ពស់សន្តិសុខស្បៀង និងអាហារូបត្ថម្ភក្នុងសហគមន៍ គោលការណ៍ណែនាំសម្រាប់សុខភាព និងអាហារូបត្ថម្ភ និងការផ្តល់អំណាចដល់យុវជន។
វេទិកានេះមានការចូលរួមពីមន្ត្រីតំណាងក្រសួង ស្ថាប័នពាក់ព័ន្ធ ទាំងថ្នាក់ជាតិ និងក្រោមជាតិ ដៃគូអភិវឌ្ឍ អង្គការសង្គមស៊ីវិល វិស័យឯកជន និងយុវជន សរុប ៧៥នាក់(ក្នុងនោះមានស្រ្តី ២៥ រូប)។

សូមគូសបញ្ជាក់ផងដែរ វេទិកាសន្តិសុខស្បៀង និងអាហារូបត្ថម្ភនេះ ត្រូវបានបង្កើតឡើងតាំងពីឆ្នាំ ២០០៣ គឺមួយឆ្នាំមុនការបង្កើតក្រុមការងារបច្ចេកទេសចម្រុះលើវិស័យសន្តិសុខស្បៀង និងអាហារូបត្ថម្ភ នៅឆ្នាំ២០០៤ ហើយត្រូវបានរៀបចំយ៉ាងទៀងទាត់២ខែម្តង ប៉ុន្តែត្រូវបានអាក់ខានអស់មួយរយៈពេលកន្លងមក៕