UN ថា មួយភាគបួននៃចំនួនប្រជាជននៅហ្គាហ្សា មួយជំហានប៉ុណ្ណោះឆ្ងាយពីគ្រោះទុរ្ភិក្ស

បរទេស៖ ទីភ្នាក់ងារមនុស្សធម៌របស់អង្គការសហប្រជាជាតិបានបន្តការអំពាវនាវឱ្យមានបទឈប់បាញ់ជាបន្ទាន់ចំពោះការប្រយុទ្ធគ្នានៅតំបន់ហ្គាហ្សាស្ទ្រីប ដោយនិយាយថា មួយភាគបួននៃចំនួនប្រជាជននៅទីនោះគឺមួយជំហានឆ្ងាយពីគ្រោះទុរ្ភិក្ស។

មន្ត្រីម្នាក់មកពីការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ ឬ OCHA បានរាយការណ៍នៅក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា ស្ថានភាពនៅក្នុងក្របខណ្ឌប៉ាឡេស្ទីនគឺធ្ងន់ធ្ងរ។

មន្ត្រីម្នាក់រូបនេះបានបញ្ជាក់ថាយ៉ាងហោចណាស់មនុស្ស ៥៧៦,០០០នាក់ មួយភាគបួននៃប្រជាជនជាង ២លាននាក់នៅហ្គាហ្សាគឺមួយជំហានឆ្ងាយពីគ្រោះទុរ្ភិក្ស។

មន្ត្រីរូបនេះបានបន្តថា ប្រសិនបើគ្មានអ្វីត្រូវបានធ្វើទេ ទីភ្នាក់ងារអង្គការសហប្រជាជាតិបារម្ភថា ទុរ្ភិក្សដែលកំពុងរីករាលដាលនៅក្នុងទឹកដីស្ទើរតែជៀសមិនរួច។

ការ​ព្រមាន​នេះ​បាន​កើត​ឡើង​ខណៈ​អាជ្ញាធរ​សុខាភិបាល​នៅ​ហ្គាហ្សា​និយាយ​ថា​គិត​ត្រឹម​ថ្ងៃ​ពុធ​នេះ​ចំនួន​អ្នក​ស្លាប់​ដោយសារ​ជម្លោះ​នៅ​ទីនោះ​បាន​កើន​ឡើង​ដល់​ ២៩,៩៥៤​នាក់។

យោធាអ៊ីស្រាអែលបានឲ្យដឹងកាលពីថ្ងៃពុធថា កងកម្លាំងជើងគោក និងអាកាសរបស់ខ្លួនបានធ្វើការវាយប្រហារលើ Khan Younis នៅភាគខាងត្បូង Gaza និងកន្លែងផ្សេងទៀតក្នុងរយៈពេលមួយថ្ងៃកន្លងមក។

មិនមានសញ្ញាណាមួយលេចឡើងសម្រាប់កិច្ចព្រមព្រៀងមួយនៅក្នុងការចរចារវាងអ៊ីស្រាអែល និងក្រុមអ៊ីស្លាមប៉ាឡេស្ទីននៃក្រុមហាម៉ាស់ ជុំវិញការផ្អាកមួយនៅក្នុងការប្រយុទ្ធ និងការដោះលែងចំណាប់ខ្មាំងដែលឃុំខ្លួននៅហ្គាហ្សា។

កិច្ចចរចាបទឈប់បាញ់បន្តជាមួយការឆ្លងរវាងប្រទេសកាតា ប៉ុន្តែត្រូវបានគេរាយការណ៍ថានៅតែមានភាពខុសប្លែកគ្នានៅក្នុងទស្សនៈរបស់ភាគីទាំងពីរ។

ប្រភព៖ NHK

ប្រែសម្រួលដោយ៖ ឡាយ លីហួ